Briefwisseling. Deel 2: 1634-1639

1687. Aan prinses Amalia van Oranje. (H.A.)*

Comme la nuict passée Monsieur le comte Guillaume faisoit diligenter sa sappe autour de la corne, malheureusement disputée avanthier, on y a apperceu si pen ou point de bruict, qu'enfin des gens montants pour veoir ce

[p. 302]

qui s'y faisoit, ont trouvé que l'enemy l'avoit abandonnée tout a faict, n'y ayant laissé qu'un nombre de picques - dont peut estre les porteurs ont esté tuez - quelque poudre et autres nippes de neant. Ceste victoire, obtenue sans incommodité, avance fort noz affaires, et va on travailler aussi de ce costé là à la galerie, noz gens logeans tout à couvert sur le bord du fossé de la ville. De son costé Monsieur le comte Henry est aussi apres à passer le fossé de la corne, et reste à veoir, quand tant d'attaques les vont joindre de si près, si le gouverneur resoudra à attendre la mine dans ses bastions. Plusieurs en doubtent, mais le capitaine espagnol prisonnier, Don Giuseppe de Vergara, nous veult asseurer qu'ouy, et bien plus, que le gouverneur qui est homme, dit il, assez temeraire, soustiendra jusqu'à trois et quatre assaults, si on les luy porte, l'ayant asseuré souvent que l'Infante Cardinal ne le verroit pas sortir vivant hors de Breda, que son heure estoit venue, enfin qu'il y pretend mourir et se battre à l'extremité. On verra s'il a le coeur aussi fort que la bouche. Devant Breda, le 12^e de Sept. 1637.