Briefwisseling. Deel 2: 1634-1639

1727. Aan prinses Amalia van Oranje. (H.A.)*

Le mauvais temps qu'il a faict ceste nuict n'a point empesché, qu'on ne soit venu à bout d'un bon dessein, qui estoit de prendre un certain ravelin à droicte de la galerie des Françoiz, qui nuisoit beaucoup, et dans lequel, mesme quand on eust travaillé à la mine dans le bastion, les assiegez eussent peu se prevaloir de quelque canon, comme il nous en alloit à Boisleduq. Ceste execution a esté faicte sans resistence, par le moyen du pont qui debvoit servir à Hulst, et dont la prattique aggrée tant à S.A. qu'il parle mesme d'en faire un essay au fossé du chasteau, maintenant que ceste nuict aussi M. le comte Henri s'y est emparé de la corne, sans perte notable de gens. De decà nostre galerie françoise est si avancée, qu'on ne fera presque, pour l'achever, que jetter de la fascine, et S.A. faict estat qu'on aura passé à ce soir ou demain au matin.

[p. 320]

Vers M. le comte Guillaume ils tienent aussi les deux tiers du fossé, de sorte qu'il y en a qui estiment, que le gouverneur n'attendroit peut estre pas la mine, si S.A. l'envoyoit sommer dès a present. - Geertrudenbergh est si proche, que sans doubte j'entretiens V.A. de vielles nouvelles, mais elle se souviendra, j'espere, de ses commandements, qui me rendent si importun. Devant Breda, le 2^e d'Octob. 1637.