Van ionx op behoortmen zijn kinderen school te setten.
BEminde Compeer N.N. Ick recommandeer my in alle ghediensticheydt 'tuwaert. Den vvaeromme van desen is, dat ick V L vvt sonderlinghe vrientschap vermane, dat ghy u Kinderen van ioncx op vvilt School setten. Want op straet en leeren die Kinderen niet dan alle ondeucht van malcander. En contrarie in goede Scholen vvordense ghestyleert en onderwesen in alle deuchden, 'twelck heur daer na altijdt by blyven sal. Want vvat die Kinderen in haer Ioncheyt leren, 'tzy deucht oft ondeucht, dat onthouden zy daer nae al haer leven lanck: Want die Kinderen zijn als schoon Pampier. vvatmen eerst in schrijft dat blijft daer in: Dus beminde vrient rade ick u in alder manieren u Kinderen vroech van strate te nemen ende School te bestellen, op datse moghen eerlijck leven en salich sterven. Beminde Compeer zijt hier mede den Heere bevolen, gheschreven in Haerlem den derden Ianuarij. Anno 1588.
Al uwen goeden vrient N.
Aenden eersamen I.P. mijn goede vrient vvoonende inde Warmis strate. Tot Amstelredam.
Auteursrechtvrij