Middel om vvel te leeren.
VRiendelijcke groetenisse gheschreven aen v mijn seer beminde discipel N.N. soo ick anders niet en soeck dan v voordeel ende profijt om vvel te leeren. Soo schrijf ick u hier int corte, hoe ghy u aenstellen sult om vvel te voorderen in u studeringe ende leeringe. Een goet School-kindt sal hem selven dickwils aen porren tot neersticheydt, denckende datter inde Werelt niet costelijcker en is dan const ende vvetenschap ende dat hy hierom gheen arbeydt oft moeyten behoort te sparen om die te vercryghen, hierom sal hy scherp toeluysteren nae 'tgheen dat hem gheleert vvort, en doen dat hem bevolen vvort, hy sal hem selven schicken by naerstighe KInderen, ende leeren altijt om strijdt, om anderen verby te leeren, hy sal hem verheughen als hy prijs begaet en verfoeyen als een ander prijs en eer begaet ende hy niet. Voort sal hy vvel vorderen,
Met vraghen, onthouden, en voort leeren,
Comen School-kinderen tot grooter eeren.
Beminde discipel vvilt v studeren hier nae reguleren, soo suldy vvel leeren, ende sult prijs en eer begaen. En zijt hier mede den oppersten Schoolmeester bevolen Christo Iesu.
Aenden eersamen Ionckman N.N. vvoonende inde hout-straet. Tot Haerlem.
Auteursrechtvrij