Ghemeene seyndtbrieven

Om een goet houwelijck te doen.

SEer beminde Soon, Ick heb verstaen dat ghy sonder mijn advys ende vveten begheert v te begheven tot den Houwelijcken staet 'twelck onbehoorlijck is, vvant het is vvel reden dat ick daer mede een segghen in hebbe, aenghesien u vvel-

[fol. A8r]

varen van my moet comen. Ick en soude niet geern sien dat ghy mishouwen sout, vvant aen een houwelijck en hangt gheen cleyne saeck, maer 'tis dickwils een mensche zijn eeuwighe ende tijtelijcke qualijckvaert of vvelvaert, daerom siet voor v vvie ghy by die handt neemt, vvant het is haest ghetrout dat langhe nae rout. Daerom mijn begheeren is op u dat ghy eerst Godt den Heer om gratie sult bidden, dat hem believe voor u te versien een Godvreesende Huysvrou, daer ghy in ruste ende in vrede v leven mede moecht overbrenghen, en daer ghy kinderen by mocht teelen, om die ter eeren Godts op te brenghen. Ghy sult niet alleen letten op die schoonheyt, vvant die niet langhe dueren mach. Noch op rijckdom. Maer let principaelijck op die persoon, vvant die de persoon mist die mistet al. Siet nae uwes ghelijck van goet en Iaren, en geslacht, vvant ghelijck by ghelijc dat paert best. Maer voor al siet nae een deuchdelijcke Godvreesende persoon, die haer ouders ghehoorsaem is, vreetsamich cloeck ende vernuftich, ende goet aerdich is. Dus doende sult vvel doen, ende ick sal u ten besten helpen, daer ick can of mach, met goet en raet. Sijt hier mede den Heere bevolen.

V Beminde Vader.