VVat oprechte edelheyt, rijckdom, heerschappye ende eere is.
MIjn vvelvercoren vriendt, Ic presenteer mijn ghediensticheyt t'uwaert u biddende vriendelijck dat ghy my niet en spaert, in 'tghene daer ghy my in van doen moecht hebben, vvant ick in u sonderlinghe ghehouden ben, overmidts die voorgaende vrientschap die mijn t'uwen huyse gheschiedt is, en om niet heel ondanckbaer te vvesen, soo schrijf ick u sommighe puncten die een Ionckman behoort te vveten, daerder veel in dwalen, vvant sommighe vermeten hen edel te vvesen, overmits dat zy van een hooghe afcoemst zijn, en leuen nochtans onbehoorlijck, 'twelck ick gheen edeluy, maer boeren acht te wesen, overmidts dat zy haer selven ende haer gheslacht onteeren die zy met een gheschickt leven behooren te vercieren: vvaerom alleen voor edel zijn te achten die edele vvercken doen, 'tzy rijck oft arm, borger oft landtman. Ghelijckerwijs oock alleen voor rijck ende machtich te rekenen zijn, die hen laten ghenoeghen met het gheen datter Godt verleent heeft, ende groote barmherticheydt bewijsen aen haer eue mensch, ist niet lichamelijck so ist gheestelijck. Voort acht ick sulcke menschen groote heerschappie te hebben, niet die veel ghebiets hebben. Maer die veel menschen met raet en daet bystant doen ende heerschappye hebben ouer haer selden. En acht sulcke menschen goet cier te maecken niet, die haer selven mesten als Verckens, maer die een vrolijck ghemoet draghen, ende blygheestich leeven. Ten is oock gheen eer dat yemandt groot gheacht vvort om zijn ghelt of goet, lant of sant, maer om zijn deuchden. Beminde vrient, hier uyt moechdy mercken vvat oprechte of valsche ryckdom, of edelheydt, oft eer, of Dominatie is: Soeckt die oprechte, ende laet die valsche ende gheconterfeyte dryven, en blijft den Heer bevolen.
Auteursrechtvrij