Di ripiente a drent'e un sustu...... Si un hende bula sali for di skuridad i kwe choka...... Ai, no, ko'i loko...... Awor aki tur hende ta na sonjo. I no ta existi spiritu......
Gachi a sagudi su kabes, pa klara su sintí un poko. I el a span su wowonan, pa e mira unda e ta kamna.
Un krenchi mas periba el a mira e kas di Ditu. Ke men ku un binti meter despwes e muraja di santana ta kuminsa. Ei tras e mester pasa, pa den un sinku minut e jega kas. Un kacho a dal un gritu.
‘Sera bo......’, Gachi a grunja den djente. Aunke sustu a but'e keda para un ratu. Sinembargo mesora el a grita hari, pasobra un kacho sokete a but'e spanta.
‘Mi no tin miedu di nada i di ningun hende’, e mes a kurasha su kurpa. ‘Spiritu ta pantomina pa spanta mucha chiki ku hende muhe’.
Ora el a sinti ku su mes stem a dun'e brio, el a lora drenta riba e kaminda di tera tras di santana. Ma e no tabatin kurashi di drei mira e muraja shinishi ni e kèldunan blanku.
‘Est'un dushi fresku’, e so a papia, ora el a sinti e bientu di marduga dal den su kara.
‘Trrr’, el a tende djis su tras. Di golpi Gachi su kurpa a bira friw. Su wowonan a kuminsa bula di un banda pa otro, i el a sinti kon sodó friw a kore den su roi di lomba.
‘Sigui kamna, Gachi’, el a bolbe duna su mes kurpa kurashi. ‘Sigui kamna trankil di bo. Nada partikular no a sosode’.
‘Trrr...... trrr’, e kos a bolbe zona asina Gachi a kuminsa kamna. Gachi a sera djente i lanta pia.
‘Trrr...trrr, trrr......’ e kos a zona mas duru su tras.
Gachi a bira tur sará. Rapidamente el a bira kara, wak su tras, i grita: ‘Ta ken?’. El a tende bientu supla i algun rama di palu raska riba otro. Tur e mondi rondo di dje tabata sukú. Te lew aja un gai a kanta.
Den su mes Gachi di: ‘Miho mi no tuma ningun riesgo’. Mesora el a kita su bachi, boltu e banda robes, i bisti'e ku e fúru parti pafo, pa asina e por kita spiritu for di su kurpa. Konfiando riba e bachi banda robes, Gachi a kuminsa kamna mas purá. Pero apenas el a dal un par di stap, ku el a bolbe tende su tras: ‘Trrr, trrr, trrr’.
Gachi por a bira loko di nervio. Sin e sa el a kuminsa kore manera razu. Kada be e tabata hera di trompeka riba pieda den sukú. Rama di palu tabata dal den su kara, i pipita di sodó asina grandi tabata kore riba su kara.
‘Trr, trrr, trrr, trrr’, e kos a sigui su tras.
‘Labirgui, San Antoni, San Hudas Tadeo, judami, judami’, Gachi a kuminsa resa den su desesperashon. I ku un velosidad enorme el a kore subi e pida seru kaminda su kas tabata pará.
‘Eliza! Habri porta! Eliza!’ el a grita ku ansha ora el a jega dilanti di su porta di kas. ‘Habri lihe, Eliza. Tin kos malu mi tras. Habri!’
Kansá di su alma el a len kontra di muraja i kita su sombre for di su kabes.
Auteursrechtelijk beschermd
