Kwenta pa kaminda

Marietta

Despwes ku Harry a sinta mas di tres ora riba baranka di nòrt, sin kohe ni un piská, el a fada i disidi di bolbe kas numa. El a kalkula ku laman lo tabata muchu brutu, i el a piki tur su korotonan, hinka nan den su tas grandi di kweru. Pero asina el a kamna jega na su auto, el a ripara un kantidad di awa frusá nèt bòw di su radjeter. El a sak abòw i mira ku e radjeter tabata lèk ainda.

‘Esaki ta kataklisma’, el a pensa, ‘ta unda ta hanja awa aki banda?’ Ma di ripiente su sintí a dal riba e bòter di galon jená ku gasolin den su baul. Mesora el a saka e bòter, basha e gasolin den su tanki, i kuminsa kamna den direkshon di e kas grandi ku el a mira na un bon distansha. Komo e tabata hoben ainda, el a kamna sin kansa, te ku el a jega na e tranké di e kunuku. Kaminda tabatin un buraku grandi den tranké el a pasa, i sigui bon purá den direkshon di e kas.

Den esei el a tende un hende pis e. Mesora Harry a drei pa buska ta ken. Bòw di un palu di wajaká grandi, no muchu lew, el a mira un damsita na un bistí ros, sintá riba un banki. Masha kortes el a kita su sombre di kabana, saluda e muche muhe i kamna jega serka.

‘Senjorita a jamá mi?’ el a puntra e mucha muhe.

‘Si. Bo mes’. E damsita e sonrei. Harry a weta e kabei kastanja, e boka delikadu i e kurpa bunita.

‘Eh... ta poko awa pa mi radjeter mi ta buska. Senjorita por bisami unda mi ta hanja?’

‘Na e baki pariba di kas. Pero para kombersa un ratu. Ta di kon mener ta purá asina?’ Harry a hanja e invitashon un poko stranjo, pero e apariensia di e dams tabata agradabel. El a sera konosi i hanja sa ku e mucha

[p. 48]

muhe jama Marietta. Kombersashon a start, i e mucha muhe tabata papia masha purá, splikando Harry ku e ta prezu den e kunuku ei.

‘Prezu? Kon senjorita ke men?’

‘Mi tata a ponemi na e kunuku aki. Tin dos homber i un enfermera ta blo wak mi. Pero nan tur ta loko. Bo sa ki nan di? Ku mi a nase ku un defekto na mi sintí, i ku mi ta peligroso. Bo ta mira algu peligroso na mi kurpa?’

Harry su wowonan a kore pasa riba e kara bon formá, e garganta i henter e kurpa bunita. Despwes el a keda fiha riba e wowonan bèrdè. El a sinti un deseo di brasa e mucha muhe.

‘No. Nada’, el a kontestá. ‘Pa bisa senjorita kla, mi no ta kompronde e kos aki’.

‘Mi tata ta riku. Rikísimo. Ami ta su uniko ju. Mi mama a muri na Francia tempu ku nos tabata biba aja. Un be m'a tende mi tata bisa dokter, ku dia mi tabatin kwater anja, mi a morde un palomba mata i chupa su sanger kajente. Bo mes no ta hanja ku mester ta mintira? Mi no ta korda nada. Bo sa ki mi ta kere? Mi tata a pega su kurason na mi. E no ke mi kasa bai lagu'e. E ke pa mi keda kens. Ta pesei mainta, merdia i atardi e enfermera ta dunami pildora guli’.

Harry a bolbe weta e boka simpatiko. I den su mes el a pensa ku kasi sigur ta egoismo a pone e tata buta su ju muhe den e kas di kunuku. Anto e mucha tabata un bejesa. Tratabel, kalmu. Nada di lokura.

Di ripiente e mucha muhe a kwe Harry su man tene i puntr'e: ‘Bo ke salbami?’

Tur sorto di pensamentu a kuminsa pasa den Harry su sintí. E mucha ta bunita...... E tata ta riku...... Si e hui ku ne...... e por kasa ku ne...... kisas na Colombia...... Klaro...... Jack su amigu tin un boto grandi di motor...... Si nan sali for di Wespen......

‘Tene kwidow’, e mucha muhe a avis'e. ‘No drei mira bo tras mesora. Un di e hombernan ku ta wak mi ta bini den nos direkshon’.

‘Mi ta bai jena e bòter ku awa anto. Djis mi ta bolbe’. Harry a kita bai. Pero ja su desishon tabata tumá. kaba.

Ora el a topa ku e homber grueso ku tabata biniendo for di e kas, Harry a para, salud'e i bis'e ku ta poko awa pa su radjeter el a bin buska. E homber a munstr'e unda e baki ta keda.

Sigun Harry tabata jena e bòter, el a weta ku e homber a para bisa e mucha muhe algu, i sigui kamna bai mas lew.

Asina Harry tabata kla, el a bolbe bon purá serka e mucha muhe, i puntr'e kiko e mester hasi pa nan hui.

‘Awe nochi, banda di dos or bo ta bini’, e mucha muhe a splik'e. ‘Mi bentana di kamber ta esun di tres parti pabow. Mi ta ganja bebe e pildora i mi ta keda lantá, sperabo. Bai lihe awor, pa nan no ripará nada’.

Harry a lanta pia. Su kurason tabata bati te den su boka. For di alew el a grita e homber, jam'e danki i bai na su auto.

Henter dia Harry tabata un blòki di nervio. El a lanta tur su plaka for di

[p. 49]

banko, pasa serka Jack pa regla asuntu di e biaha sekreto i drecha poko panja den un maleta pa e bai ku ne.

Un or di marduga Harry tabata na kaminda di Bandabow den auto di Jack. El a laga e auto para na un bon distansha i kamna na pia, bai na e kas. Asina el a bati poko-poko na e bentana, Marietta a habri p'e. El a tuma Marietta su maleta. Despwes Marietta a bula bentana, bahando riba Harry su lomba. Manera pushi nan a kamna bai na e auto.

‘Porfin mi ta liber’, Marietta a bis'e masha kontentu, ora nan a jega den kaminda grandi. ‘Harry, bisami. Bo ke kasa ku mi?’

‘Pero aki no ta posibel, mi amor. Nos ta bai Colombia’.

‘Colombia? Esta dushi. Bo tin boto?’

‘Na Wespen’.

Nan a drenta auto y Harry a trapa gasolin pa e jega Wespen mas lihe posibel. Marietta a hala pega banda di dje y pasa su brasa tras di Harry su garganta. Harry tabata sinti su mes den shelu.

Su manise polisnan a hanja e auto tur kibrá kontra di un pal'i manzalinja kantu di kaminda di Sabaneta. Tur paden di e auto tabata na sanger. Harry tabata drumí boka bow riba kusinchi, morto. Na su garganta tabatin márka di djente, kaminda un hende a morde su ardu di garganta.