den su man robes el a para tantia den porta i wak tur e karanan den ofisina.
‘T'aki mi mester ta, shonnan?’
‘Adelante, amigu Felipi’, supdirektor a salud'é, ‘direktor ta sperando bo yegada.’
Felipi a purba sonreí, pero su kara a haña un ekspreshon trágiko ku tur e djentenan putrí den su boka. Sin sa kiko e hasi, el a keda stanka den porta. Ku un kordialidat eksagerá direktor a lanta bai kontra Felipi i dun'é man. Di chiripa Felipi por a saka algun palabra tor di su boka, ora direktor a bras'é i hib'é na un stul konchuá den ofisina.
Promé ku e kai sinta, Felipi a bati stòf for di su karson i opservá masha tímido: ‘Aki den ta hasi friu.’
‘Hasi bo na kas, amigu Felipi’, direktor a trankilis'é. ‘Nos tabata spera bo ansiosamente. Pasobra un hubileo di trinta aña ta algu eksepshonal. Nos ta kontentísimo ku un empleado korekto di nos a komportá su mes dignamente durante trinta aña den nos sirbishi.’ E otro empleadonan a komplasé ku un sonrisa. Felipi mes a keda sinta kara abou den su stul, miéntras ku su dedenan tur na kayo tabata frifri ku rant di su sombré.
Manera un orador polítiko direktor a sigui bati Felipi ku palabra karu. Felipi tabata ekselentísimo, fantástiko, inteligentísimo, sumamente dediká na trabou, un figura ehemplar pa henter komunidat. Pober Felipi a keda sinta skucha i hasi un bon propósito di bari tur stòf den tur huki di ofisina, i di no pasa paña sushi mas riba eskritorio di ningun empleado.
Mientrastantu supdirektor a habri e bòter di shampaña i basha algu den glas pa tur hende bebe na salú di Felipi. Sakadó di potrèt a ranka figura despues ku nan a buta Felipi sonreí sigun e ta risibí e ènvelòp serka direktor. Tur otro empleado a haña komando pa pone kara kontentu.
Den esei direktor a bira wak kuant'or tin, basha un par di palabra mas riba Felipi, i anunsiá ku ta duel e mashá ku e
Auteursrechtelijk beschermd