Un selekshon di palabra i ekspreshon. Deel 2

Inteligensia

Konosementu, saber	Sano huisio
Sabí, bobo, tapá	Un hende ku sesu

[p. 11]

Bibu, spiertu	Dos dede di frenta
Sa, konose	Kabes bashí
Ignorante, estúpido	Kabes di pal'i maishi
Kompronde, pensa	Un sientífiko
Un hende sabí o studiá	Uza bo sintí (bo sesu, bo koko)
Kòrda, rekordá	Un lèlo, un loko

Sabiduria di buki no ta sabiduria di bida. Si bo no tin inteligensia bo no por bai kumpr'e na Ulanda. El a bin pone na mi konosementu (ponemi na altura) ku e tin intenshon serio. Kada fishi tin su saber. No bin saka sabí riba mi. Bo ke hunga papel di bobo, pero mi sa ku bo ta leu di animal. Un persona tapá ta 1. un persona hopi bobo. 2. un ku no sa kon komporta den kompania di otro hende.

Tene kuidou ku gai bibu. Un mucha bibitu tin alegria den bida. Un hende spiertu ta bon na su tinu. Un ignorante ta un ku no sa algu; un estúpido ta un bobo. Nos tin sintí pa nos pensa i kompronde. Esun ku studia bon tur dia i no na ultimo ora, lo kòrda tur kos na momentu di eksamen. Dia 26 di juli nos ta rekordá deskubrimentu di Korsou.

Un loko por puntra loke shen sabí no por kontestá. Djis un tiki siñansa ta mashá peligroso. Sikologia ta e siensia ku ta dedika na estudio di naturá, forsa i funshon di espíritu humano. Lavoisier, Einstein, Pascal i Leibniz tabata sientífiko.

Bo sa kon e asuntu akí ta kome-bebe? (bo konose su detayenan?) Bo kabes no ta pa pieu so kome (uza bo sesu). Ora un hende bira loko o tolondrá, e ta perdè sintí. No pèrde kabes, keda kalmu den difikultat i problema. Mani su kabes no ta bon (pareu). Sintí ta yuda brasa (den tur loke nos ta hasi nos sintí ta yuda nos).

Felipi a kumpli 98 aña, pero e ta bon na tinu i e tin bon memoria. A dal na mi sintí (di ripiente m'a kòrda). Ainda Pedritu su djent'i wowo no a sali (ainda e ta muchu hoben pa huzga). Eufemístikamente nos ta yama un hende kèns o pasá un lilos, lolas o pintòl.

Nos ta skezidu ora nos ta lubida mashá. Si bo dal bo kabes, bo ta keda zonzá. Si bo tin hopi problema na bo kabes. bo por tolondrá o brua. I ora bo lanta fo'i soño, bo ta keda zurú o zur'i soño. Karné ta kana kabes abou, ma e sa kuant'or tin (un bobo tambe sa algu). Pober Tuyu no ta mashá kasé (no tin muchu sesu).

Lora bieu no sa siña papia. Sintí di hende ta kashi di piká. Leonsitu no sa ni un pátaka dje asuntu akí. Tin mas loko afó ku tin den Montekristu. Djaka ku trampa a hera, no ta kome mas (esun ku eksperensha no ta bolbe komete mesun eror). Baka a sinta pensa, te nan a hisa kachu buta riba su kabes.