Un selekshon di palabra i ekspreshon. Deel 2

Teatro i sine

Komedia, tragedia, drama	Pelíkula, short
Artista, aktor	Krítika, sensura
Públiko, ouditorio	Palko, preferensha, galeria
Figurante	Intermedio, pousa
Dekorashon di teatro	Podio, plataforma
Dramaturgo, esenario	Aplouso, bati man
Telon, pantaya di sine	Pelíkula di koló o pretu ku blanku
Akto, esena	Kompania di teatro
Material eséniko	Krítiko dramátiko (teatral)
Adaptashon eséniko	Obra teatral (obra dramátiko)

Un protagonista tin e papel prinsipal. Un dramaturgo ta skibi obra teatral (tragedia o komedia). Sigun nan ta pasa un pelíkula, nos ta mira djeseis pòtret pa sekòndu. Charles Laughton i Lawrence Olivier ta dos gran artista di sine. Nos ta sinta ariba den palko o abou den preferensha. Galeria tabata e lugá di mas barata, te mas patras, ma ya e no ta eksisti mas.

Un dramaturgo ta hiba un eskritor e ventaha ku e por sinta den teatro, mira e aktornan presentando su obra, i na mes momentu haña sa kiko públiko ta opina. Promé ku pelíkula kuminsa, nan sa pasa short (fragmento di otro pelíkula). E drama ‘Tula’ di Pacheco Domacasse tabata un éksito na Centro Pro Arte. ‘Maria di Malpais’, un adaptashon di Raul Romer dje misterio medieval ‘Maryken van Nimwegen’ a keda presenta den hopi bario di Korsou.

Na 1871 teatro Nahr (kaminda awor akí ta Roxy, pero na e parti patras) a keda inougurá ku e obra ‘La Gracia de Dios’ di e outor benesolanu

[p. 15]

Manuel Maria Bermudez Avila. Jules de Palm a tradusi i adapta e obra di Shakespeare ‘A midsummernight's dream’, ku tabata presentá den teatro Asiento na Korsou, ku e título ‘llushon di anochi’.

Drama griego a nase for di e solemnidatnan religioso, esta dje seremonianan relashoná ku e kulto di Dionisio. Un drama ta partí den akto; kado akto ta partí den varios esena. Corneille, Racine i Goethe ta tres dramaturge di literatura oropeo. Den un ‘Musical’ e intriga ta bira mas bibu pa medio di variashon dinámiko di muzik, kanto, ballet i show.

Un krítika (reseña) ta un opinion, generalmente den korant, tokante un obra. Esaki ta trabou di un krítiko dramátiko (teatral). Komishon di sensura tin ku mira tur pelíkula promé ku presenta nan pa públiko. Un aplouso ta manera bálsamo sublime pa un aktor, aunke ta un kantidat di man bashí ta bati, hasiendo ruido. Nan ta proyekta pelíkula riba un pantaya.

‘Hunga ròl’ ta un ekspreshon relativamente nobo. Muzik tin un papel importante komo ‘fondo’ den un pelíkula. E grupo di ‘Thalia’ a kue hopi fama ku su diferente presentashonnan teatral.

Hollywood ta konsiderá komo e paraiso di arte sinematográfiko. Suesia, sinembargo, tabata e promé pais ku a revelá e beyesa visual i emotivo dje ‘di shete arte’ (arte sinematográfiko). Un sineasta manera Ingmar Bergman a dun'e prestigio universal.