Itinerario, voyage ofte schipvaert naer Oost ofte Portugaels Indien 1579-1592. Deel 3

Porrete Veneçuela, kleijn Venegien.

⁺Die gheheele Custe van den hoeck De la Vela, tot die Golfo van Paria is ontdeckt ende ghevonden van Christophoro Colombo, int jaer 1498. Die eerste Gouverneur van Venezuela is gheweest een Hooghduijts, gheheeten Ambrosius Alfingher, die uyt die name der Welsaren aldaer ghetrocken is; Die Keyser haer die stadt verset hebbende int jaer 1518.²⁾ welcke ghestorven is van een vergifte pyle, ende zijn volck meest van hongher vergaen, aten Honden ende oock eenige Indianen. Alhier is een Bisdom, ende die stadt wort Veneçuela gheheeten, om dat zy int water op een evene rotse

+ Porrette Venecuela ofte kleijn Venegien, de eerste Gouverneur een Hooghduytsch.

2) Lees: 1528. Zie Benzo I 25 (blz. 109).

[p. 105]

ghebout is, welck water een Lack is, ghenoemt Maracaibo, ende⁺ van die Spaengiaerden Lago di nosta Donna; Die Vrouwen van hier zijn veel hoflijcker ende beter ghemaniert, dan die van de naestligghende provincien, zy schilderen haer borst ende armen, gaen anders naeckt, doch bedecken hare schaemte met eenich kleet, ende het waer een groote schande sulcks aflatende; Soo oock jemandt sulcks ophefte, dede haer een groote oneere ende injurie. Die Dochters kent men aen die verwe ende die grootheyt van die banden die zy draghen, ende sulcke draghende is een ghewis teecken van haer maechdelijcke staet. Die mannen int⁺ generael draghen haer manlijckheyt in eenighe schulpen; Aenbaden Afgoden ende de Sathan, dien zy afmaelden ghelijck zy hem hoorden spreken, ofte ghelijck hy hem openbaerde. Inde oorloch gebruijcken zy oock vergifte pylen ende lancien van 25. palmen lanck; Riede Messen, groote Rondassen van schorsen ende leder; Hare Papen die oock medecijns zijn, vraghen die siecken⁺ daer tot zy geroepen zijn, ofte zy ooc ghelooven dat zy haer helpen moghen, legghen hare handen op die plaetse daer die pyne ofte die apostemate, ofte dat gheswel is, schreyen ofte roepen, ende inghevalle zy niet ghenesen, werpen zy die schult ofte op den krancken, ofte op die Goden, aldus handelen alle haer medecijns. Des nachts beweenen zy hare Heeren, het weenen is singhen van zijn⁺ dapperheyt, daer nae braden zy hem, ende stooten hem cleen, ende alsoo drincken zy sulcks in Wijn, 'twelck een groote eer by haer is.

Van Veneçuela tot C. di S. Roman 80. mylen.

Van S. Roman tot Golfo triste, zijn 50. mylen, waer in gheleghen is Curiana.

+ Maracaibo. Lago di nuestra Sign. alhier seer geschickte vrouwen die haer schaemte decken.

+ De mans draghen haer manlijckheyt in schelpen.

+ Seltsame vraghe van haer Papen die haer Medecijns zijn.

+ De dooden van haer Heeren worden by nacht beweent.