Argument op de Psalmen.
HEt boeck der Psalmen houdt in heylighe liedekens, welcke inde oude
Israelitische kercke beschreuen zijn gheweest, tot aen den bedroefden
tijt des Conincks Antiochi: Derhaluen soo is dit als een cort begrijp
des ouden testaments, een spiegel der ghenade Gods, ende eene volcomene
afbeeldinghe des menschen innigher ghenegentheyden, daerinne allerleye
onderwysinghe begrepen wort: Als van de beloftenissen, wercken ende gherichten
Gods, die ouer de syne ghenadich zijn: ouer syne vyanden strenghe: ende ouer
alle menschen rechtveerdich. Item van onse ghelooue aen syne geloften, van onse
ghehoorsaemheyt, swackheyden, gheduldicheyt, volstandicheyt, ende verlossinghe
in teghenspoet. Van het rechte wettelijcke ghebruyck syner goede gauen, Ende
danckseggingen in voorspoet: ende int corte van onsen behoorlijcken ende
schuldigen plicht tot God, ende van syne ghetrouwicheyt tot ons waerts in
Christo: vanden welcken uytnemende seer schoone, ende claere Prophetien
allesins voorghebracht werden, tot vertroostinghe ende versterckinghe der
ghemeynte des Heeren.
Auteursrechtelijk beschermd