De cleyn vverelt

[fol. 74r]

[Van Zeuxis en Parrhasius hout in memorie]

Van Zeuxis en Parrhasius hout in memorie,
Tvvee constighe Schilders, een schoon historie.

Eccles. 9.

In die hant der constenaers seer vvtghelesen,
Sullen hare vvercken eeuvvich sijn ghepresen.

[fol. 74v]

 

Zeuxis heeft soo constelijck ghevvrocht een kint,

 

D'vvelc een druyve in syn hant droech, dat die vogels, bytye

 

De selve dicvvils vvaren te nemen ghesint.

 

Daerom heeft Parrhasius ghesproken vvt inuye:

 

Hadde t'kint ghedaen ghevveest naer t'leven blye,

 

Sy en hadden hem de druyve niet dorven onthalen:

 

Maer souden ghevreest hebben in haer fantasye

 

T'gheselschap des menschen (soo die vvijse talen.)

 

Met dien ginck hy en schilderde binnen synder salen,

 

Op den muer, een gordyne soo constich, en soo reen

 

Dat Zeuxis die op meynde te lichten sonder falen,

 

Ende sloech syn hant teghen den blooten steen.

 

Zeuxis had bedroghen die voghelen alleen,

 

Maer die vvyse Parrhasius in consten hooch

 

Verschalcte den meester, die de voghelen bedrooch.