Princeliicke deuiisen

[p. 186]

LXXX. Lex exlex.

De vvet is sonder vvet, als elck heur maeckt en breeckt:
Als sij de rijcke spaert, en d'arme straft oft wreeckt.

[p. 187]

 

De wet en is geen wet, eylaes, bij veel verstanden,

 

Wanneer de rechts boos, oft heeren vande landen

 

Heur vonnis schorten op, om dat het onghelijck

 

Bij een is die van gelt oft have is bijster rijck.

 

Sij draeyen al den sin der ongheveynsde wetten,

 

En seghen dat sij dan recht op de saken letten:

 

Den rijcken breeckt den strop, den armen worght daer aen:

 

Den rechter wort een schelm, die schelmen vrij gaet gaen.

Anders.

Soo Anacharsis seydt, de Wet wort vergheleken
Met Spinnecoppen-web, die al het licht ghedrocht
Als Vliegen, Mugghen teer, in heuren strick gebrocht
Vast-houdt, soo dat sij daer veeltijts in blijven steken:

Maer ander Vogels sterck, met swaerte oft met ghewelt

Die breken al te haest dees web, ter aerd ghevelt.
De rijcke swaer van goet het Recht doen nederdalen:
Den armen moet de straff met sijnen hals betalen.

ANacharsis den Filosoof vergeleeck de Wetten ende Gheboden des Overheyts bij de Webben oft Netten van de Spinnecoppen, (als Valerius Maximux verhaelt) de welcke vanghen, ende blijven vast houdende, de Mugghen, cleyne Vlieghen, Vijfwonters oft Pepels, ende ander cleyne beestkens: maer laeten de groote ende stercker doorgaen. Het selve doen de Wetten oock: de welcke door quade wtlegginghen soo verstaen worden, datse niet en verbinden de rijcke machtighe menschen: maer daerentegen seer straff ende hardt zijn om de arme, onmachtighe, swacke, ende weinich vermogende te bedwinghen.