Rethoricale wercken
(1562)–Anthonis de Roovere–
Auteursrechtvrij
[Folio 42v]
| |
Streckt vander aerden in tshemels stede
Lancx doore ghesneden net ende rijckelijck
Metter saghe van Gods voorsienichede
Ghedeylt in tween, met volder vrede
Als leedere, tonsen alder ghewinne
De tranen ghenaempt (lof hem diet dede)
Deene Charitate, en dandere Minne
Hooghe streckende ten hemel inne
Dies seg ick haer die ons noydt en faelde
Lof Leedere daer Christus in minnelijck daelde.
Seuene sporten heb ick gheuonden
Dies men v kendt een leeder reyne
Deerste heedt Schouwinghe van sonden
Want Gabriel die vandt v alleyne
Voort Schaemelheyt van sinnen ghemeene
Want Dsenghels groeten v wonder dochte
Heylighe vreese ghebrack v noydt gheene
Dies dEnghel v trooste met woorden sochte
Wijsheydt, ghy vraechdet hoet wesen mochte
Reynicheydt, ghy en hadt noydt mans verkeeren
Onderdanicheydt, tconsent voort brochte
Oodtmoedicheydt, siet hier de deerne ons Heren
Dit is de leedere om vruechts vermeeren
Die int hoochste des hemels, de Gods sone haelde
Lof Leedere daer Christus in minnelijck daelde.
Maria van deser stoffen helich
Waert ghy als leedere fatsoen ontfaende
Daer van bouen Gods Enghelen spelich
Ende van beneden op waren ghaende
Godt den Vadere zijn ooghen slaende
| |
[Folio 43r]
| |
Op dese leedere soe wel ghedeelt
By comparatie soot noodt vermaende
Heeft thoochste en duysterste in v gheheelt
Noydt leedere soe rijckelijck ghepaercheelt
Daer ons Godt soe crachtelijck baerde
Want uwe duechden zijn veel gheiuweelt
Dies blijft ghy eewelijck de vermaerde
Ghy zijt die leedere van wien verclaerde
Jacob, die door den hemel straelde
Lof Leedere daer Christus in minnelijck daelde.
Princhersse, de stede was heylich en goedt
Daer Jacob de leedere soe chierlijck sach
Maer v stede was beter, vol der oodtmoedt
Daer Christus als Godt ende mensche in lach
Dies wy v loven nacht ende dach
Ghy zijdt de Yeuens misdaet betaelde
Waer by elck kerstene wel segghen mach
Lof Leedere daer Christus in minnelijck daelde.
|
|