Doe bleefs in mich

[p. 24]

Ich maag dit jaor...

Ich maag dit jaor de nachtegaal nog heure,
Mer dan (wae wit?) mesjins auch gaar neit mee.
Want eeder ougeblik kan get gebeure:

Me wit mer neit wienee.

Mer 'ch zal hööm noe nog waal beloestre kònne,
Es taegen aovend sjtil de maon opgeit
En blui en blaad, van wie hae is aan 't zènge,

Gans wie betouverd sjteit.

Oos meuleraad blif in de wiedte roesje,
De baek blif zènge wie ze ummer zòng.
Mer alle sjwiege is meziek gewoore

Esof den heemel sjpraeke gòng.

Nog eimaol maag ich loestre, maag ich heure
Nao miene leive, leive nachtegaal.
Es hienao 't leste mit mich zou gebeure:

‘Present, Heer Generaal!’