Doe bleefs in mich

[p. 63]

Wies weurd

Ich bèn gebaore oppe Mert,
Höb déks daovan gesjpraoke,
Noe sjteit eine nuuje gevel dao:
Oos hoes woort aafgebraoke.

Me koos van dao sjus op 't Sjtadhoes
En den trap van de ziekantj kieke:
Ei' paleis, parbleu, mit angesj niks
In de sjtad te vergelieke.

Dao gòng bie eeder trouwpartie
De sjtoet van de broed nao baove;
De broed in 't wit mit krans en sjleip,
Te blameire of te laove...

Es 't meines waar, koum Tant Gerardine
Bie òs nao dae pòppekas kieke,
Veural es 't gòng òm deftige luuj
En de kleier van de rieke!

En wie 't dan aafgeloupe waar
(‘Komt, sjpouwt uch: dao zeen ze! dao gaon ze’)
Zag mien Tant: ‘La comédie finie;
‘Maintenant, le drame commence!’