Werken. Deel III

* II. Grondslag en richting van een heilig leven *

Ghi sult weten, dat fundament alder heilicheit <es>³⁾ puerheit der conzienciën. Ende hier-omme seldi u-selven prueven ende merken van uwen kintschen daghen. Ende vendi⁴⁾ yet in u dat ghi oordeelt dootzonde, daer-ave suldi u purgeeren vore uwen priester ende vore die ewighe waerheit gods, met rouwen, met biechten ende met ghenoech doene. Ende dan suldi hopen ende ghetrouwen sonder twifel der ghenadicheit gods, dat u uwe zonden vergheven syn. Ende al heeft u god uwe sonden vergheven, nochtan suldi u altoes houden vore sine ontfermherticheit, ende met herten ende met begherten van binnen roepen: ‘Heere ontferm<e>⁵⁾ u <mijns>⁶⁾, armer sonderssen!’ Ghi selt uwe ghemoede tot hem verheffen met eeweghen love. Ende ghi sult uwe begherte, met der goetheit gods, wide ute-breiden tot allen heilighen ende tot allen [goeden]⁷⁾ menschen, met eewigher minnen. Ende ghi selt uwe herte oetmoedighen ende nederen met groter reverenciën vore die hoghe moghentheit gods, ende vore die voete ons heeren jhesu cristi. Ende aldus seldi u oefenen, ende hier-ave maken eene hebbelycheit⁸⁾ ende een abyt⁹⁾, daer ghi in woenen ende wandelen sult alle uwe leefdaghe.

3) G, w, D, K; ende F.

4) Vindt gij.

5) G, w, D; ontfermt F, K.

6) G, w, D, K; mijnre F.

7) Om. G, w, D.

8) Gewoonte.

9) Vgl. Latijn: habitus, gewoonte.