Werken. Deel III

[p. 85]

* III. Het morgengebed en de h. mis *

Ende in yeghewelcken daghe, des morghens alse ghi opstaet, soe valt neder op uwe kniën, ende bidt oetmoedelyc onsen heere dat ghi in dien daghe uwen dienst alsoe volbringhen moecht, dat¹⁾ hem si eerlyc²⁾, ende u salichlyc, ende al den convente <rastelec>³⁾ ende vredelyc. Hebdys⁴⁾ stade van uwen dienste, ende oorlof van uwen <prelaten>⁵⁾, soe seldi hooren messe. Inden beghinne vander messen, so seldi beliden ende claghen gode uwe sonden ende uwe roekeloesheit⁶⁾ ende uwe ontbliven, ende bidden hem dat hi uws ontferme ende genadich si. Daer na seldi hem bidden, dat hi u wise ende leere den wech der waerheit [ende]⁷⁾ der duecht ende der gherechticheit. Hoordi sermone ochte eenige goede leeringhe, dat seldi nauwe merken, <ende>⁸⁾ meer omme <leven dan om>⁸⁾ weten; want die vele weet ende niet en leeft, hi verliest den tyt. Voert inder messen, soe seldi vore-nemen⁹⁾ dat lyden ende¹⁰⁾ passie ons heeren. Die seldi overdincken met minlycker compassiën, ende selt hem dies dancken met oetmoedigher devociën, dat hi, om uwen wille ende omme uwer zonden wille, mensche werden woude, leven, ende sterven woude die scandelycke bitter doot. Ende die seldi offeren sinen hemelschen vader. Ende daer-mede suldi offeren u-selven, ende al uwe noet, ende al den orbore der heiligher kerstenheit, ghelyckerwys dat hi selve dede, doen hi sterf¹¹⁾, ende noch doet in dat eewighe leven vore dat aenschyn syns vaders. Ende dit es die weerdighe sacraficie die cristus selve dede, ende die noch doen alle priestere inder messen, daer si consacreeren inder cracht gods cristus vleesch[s]¹²⁾ ende syn bloet, ende offeren dat in ghedinckenissen synder passiën ende synder doot ende synder eewigher minnen die hi ons bewyst hevet inder tyt ende noch bewisen sal inder eewicheit. Ende hier-mede seldi offeren die hoghe

1) Dat het.

2) Vereerend, heerlijk.

3) G, w, D, K; raste F.

4) Hebt gij dies.

5) G, w, D, K; oversten F.

6) Onachtzaamheid.

7) Om. G, w. D, K.

8) Add. G, w, D, K.

8) Add. G, w, D, K.

9) U voorstellen.

10) Die add. w, K.

11) Stierf.

12) G, w, D, K.

[p. 86]

weerdicheit mariën¹⁾ ende alle der apostele, ende alle de martilie der maertelaren, ende de vaste eersame belyïnge der confessoren, ende de suvere reynicheit der maechde, ende den lof der inghelen, met alle den dienste der heiligher kercken. Ende met al deser offeranden, ende met al uwen crachten, ende met al dien dat ghi gheleysten moghet, soe seldi u opgheven²⁾ vore die oghen gods. Ende daer suldi wandelen ende woenen, met dancke ende met love ende met hertelycker liefden. Soe werdi deelachtich, <der passiën ende der doot>³⁾ ons heren, ende alle dies goets dat je ghedaen wert, och [n]emmermeer⁴⁾ ghedaen sal werden, in hemel ende in eerde. Want aldus ontfeet men alle die vrucht⁵⁾ des sacraments gheestelyc inder zielen.

1) Van Maria.

2) In overgave opdragen.

3) G, w, D, K; trnsp. F.

4) G, w, K.

5) Vruchte w, D, K.