Werken. Deel III

* I * Dit es de ierste trappe. * Gelijvormigheid met Gods wil. *

Ende alse wi eendrachtegh ende eenwillegh sijn met den wille ons heeren, soe hebben wi de ierste trappe in den graed der minnen ende heileghs levens. Een goet wille es fundament van allen dooghden. Ende hier-omme sprect de prophete david: ‘Heere, ic ben tote u ghevloon, leert mi te werkene uwen wille, want ghi sijt mijn god; dijn goede gheest sal mi leiden int rechte land’⁶⁾: der waerheit ende der dooghde. Een goet wille den wille gods gheëenecht, verwindt den duvel ende alle sonden; want hi es vol der gratiën gods, ende hi es de ierste offerande die wi gode sculdegh sijn ende gheven moeten, selen wi heme leven. Die goetwilleghe mensche meint⁷⁾ ende begheerdt gode te min-

6) Vgl. Ps. 142, 8, 9, 10.

7) Heeft voor doel.

[p. 224]

nenne ende te dienenne nu ende eewelec. Ende dat es sijn leven ende sine ufeninghe van binnen, ende daer-in heeft hi vrede met gode, met hem selven, ende met allen dinghen. Ende alsoe songhen de inghele in der locht doe cristus gheboren was: ‘Glorie gode hier-boven, ende in der eerden vrede den menschen die goeds willen sijn’¹⁾. Goed wille en mach niet leedegh sijn van goeden werken. Want de goede booem bringht goede vrocht, sprect onse heere²⁾.

1) Luc. 2, 14.

2) Vgl. Matth. 7, 17.