Nieuwe testament (Noordnederlandse vertaling)

VI

Hoedet u, dat ghi uwe rechtverdicheyt niet en doet voer den menschen, dat ghi van hem yet ghesien wert, want alsoe en soude ghies gheen loen hebben bi uwen vader die inden hemel is. Wanneer du aelmissen doeste, en wil niet mit basunen blasen voer di als die ypocriten doen in synagogen ende in steghen, op dat si gheeert werden vanden menschen. Ic segghe voerwaer, si hebben hoer loen ontfanghen. Wanneer du aelmissen doeste, en laet dijnre luchterhant niet weten wat dine rechterhant doet, op dat dijn aelmisse si int verborghen, ende dijn vader, diet siet int verborghen, die salt di lonen.

Ende wanneer ghi bedet, en sijt niet droevich als die ypocriten, die minnen hoer ghebede te doen, staende inden synagoghen ende inden hoeken vanden straten, op dat se ghesien warden vanden menschen. Ic segghe u voerwaer, si hebben hoer loen ontfanghen. Wanneer du biddes, ganc in dijn camer, ende sluet toe dijn doer ende bidde dinen vader int verborghen, ende dijn vader die dat siet int heymelic, salt di lonen.

Als ghi bedet, en wilt niet vole spreken als die etnici doen; si wanen ummer in horen voel spreken ghehoert te werden. En weset ghi hem niet ghelijc, want uwe vader weet wael wat u noet is, al eer ghi hem biddet. Aldus suldi bidden: Vader onse, du bist inden hemelen, gheheylighet sij dijn name, toecomen moet dijn rike, dijn wille ghescie inder eerden als inden hemel. Ghif ons huden onse daghelikes broet, ende verghif ons onse scolt als wij den ghenen doen, die onse schuldenaers sijn, ende en laet ons niet leyden in becoringhen, mer verloesse ons van allen quaden. Amen. Dat moet waer wesen.

Ist dat ghi den menschen hoer scholt verghevet, u hemelsche vader sal u uwe scolt vergheven; ist dat ghi den luden niet en verghevet, noch uwe vader en sal u uwe sonden niet vergheven.

Wanneer ghi vastet, en wilt niet als die ypocriten droevich werden: sij vermaken

[fol. 6r]

hoer aensichte, op dat si den menschen schinen vastende. Ic segghe u voer waer: si hebben hoer loen ontfanghen. Wanneer du vastes, dan salve dine hoeft ende wassche dijn aensicht, dattu den luden niet en schineste vastende, mer dinen vader, die int heymelic is, ende dijn vader, die dit siet int heymelic, die salt di lonen.

Ende en wilt uwen scat inder eerden niet vergaderen, daer hem die scimmel ende die motten verteren ende daer hem die dieve uut graven ende stelen. Vergadert uwen scat in den hemel, daer hem die roest noch die motten niet en verteren ende die dieve niet op en graven noch en stelen. Want waer dijn scat is, daer is dijn herte.

Dijn oghe is een lanterne dijns lichames. Ist dat dijn oghe eenvoudich wert, alle dijn licham sal licht wesen; ist dat dijn oghe scalc is, alle dijn lichame sal duuster wesen. Of dan dat licht dat in di is, duusternisse sijn, hoe groet sullen dan die duusternisse wesen!

Niemen en mach tween heren dienen, of hi en sal den enen haten of den anderen minnen, of den enen lieden of den anderen versmaeden. Ghi en moghet Gode niet dienen ende den scat.

Daer om segghe ic u: En wilt niet sorchvoldich wesen in uwer zielen, wat ghi eten sult noch in uwen lichame, wat ghi aen trecken sult. Is tleven niet meerre dan die spise ende is dat lichame niet meerre dan die cledinghe? Siet aen die voghelen des hemels: si en sayen noch si en mayen noch si en vergaderen in die schuren, ende u hemelsche vader voet sie. En siet ghi niet meer werdich dan die? Wie van u denkende mach tot sijnre lengden een cubitus toe doen? Ende waerom sidi sorchvoldich vander cledinghen? Siet aen die lelien des ackers, hoe si wassen ende noch en arbeyden noch en spinnen. Ic segghe u dat Salomon in alle sijnre glorien niet alsoe sierlic verdect en is als een van desen. Ist dat God dat hoy, dat huden is ende morghen inden oven gheworpen wert, aldus vercleet, voel billiker sal hijt ju doen, cranc van gheloven! Hier om en wilt niet sorchvoldich wesen, segghende: Wat sullen wij eten ende drinken, of: waer mede sullen wij ons decken? Alle dese dinghen soeken die heydene. Uwe vader weet dat ghi alle deser dinghen behoevet. Soect voer alle dinc dat rijcke Gods ende sine gherechticheyt ende alle dese dinghen sullen u toegheworpen werden. En wilt niet sorchvoldich wesen yeghens morghen: die dach van morghen sal voer hem selven besorghet wesen, elken daghe is sine quaetheyt ghenoech.