Nieuwe testament (Noordnederlandse vertaling)

XIII

Doe sprac Ihesus totten scaren ende totten jongheren ende seyde: Op Moyses stoel saten die scriben ende die Phariseen. Al dat si u segghen, dat holt ende doet; nae hoeren werken en wilt niet doen, si segghent ende en doens niet. Si binden sware bordene ende ondraghelic ende legghense op der menschen scouderen, mer mit hoeren vingher en willen si se niet rueren. Alle hoer werken doen si, op dat sie ghesien moghen werden vanden menschen, si maken brede vaeschen ende si maken grote somen, si minnen dat vorste sitten inden tafelen ende die vorste stoelen inden synagogen ende die gruetinghe inden mercten ende vanden menschen meyster te heyten. En wilt ghi niet meester gheheyten wesen, want een is u meyster, ende ghi sijt alle brueders. Ende wilt u ghenen vader op der eerden heyten, want een is u vader, die inden hemel is. Ende en wilt niet meyster gheheyten wesen, want een is u meyster, dat is Cristus. Die die meeste is onder u, die sal u dienre wesen.

Soe wie hem verheffet, die sal vernedert werden ende soe wie hem veroetmoedicht,

[fol. 16r]

die sal verheven werden.

Wee u, scriben ende Phariseen, ypocriten, die daer toe slutet dat rike der hemelen voer den menschen. Ghi en gaet daer niet in noch die inganghers en laet ghi daer niet ingaen.

We ju, scriben ende Phariseen, ypocriten, ghi verslijndet der weduen huse in uwen langhen ghebede, die ghi biddet. Daer om suldi te merre verdoemnisse ontfanghen.

We u, scriben ende Phariseen, ypocriten, ghi umgaet die zee ende dat lant om enen heyden mit u ghelovich te maken, ende als hiet ghemaect is, dan maect ghine een kijnt der hellen, die helft merre dan ghi.

We ju, blinden leyders, ghi segghet: Soe wie biden tempel sweret, die en eest niet sculdich te houden. Sotte ende blinden, is dat golt meerre of is die tempel meerre, die dat golt heylich maket? Ende soe wie dat zwert biden oltaer, dat en holt niet, mer soe wie dat zwert bider offerhande, die opten altaer is, dat sal men houden. Blinde, wat is merre, weder die offerhande of dat altaer, dat die offerhande heylich maket? Soe wie dat zweret biden altaer, die swert in hem ende in al, dat inden oltaer is. Ende soe wie zweret inden tempel, die zwert in hem ende in al dat daer in is. Ende soe wie zwert biden hemel, die zwert biden stole Gods ende biden ghenen die daer up sit.

We ju, scriben ende Phariseen, ypocriten, ghi verteent mente ende dille ende comijn ende hebt achterghelaten dat meeste inder wit, als gherechticheyt, ontfarmherticheyt ende ghelove. Dese sijn noet, dat se die mensche doe ende die ander niet achter en late. Blinde leyders, ghi cauwet [l. cleinset] een mugghe ende verslijndet enen cameel.

We u, scriben ende Phariseen, ypocriten, ghi maket den kelic ende den nap van buten scoen, van binnen sidi vol ghiricheyden ende onreynicheyden. Blint Phariseus, maket ierst reyne dat inden kelc ende inden nap is, op dattet dan reyn mach werden dat buten is.

We ju, scriben ende Phariseen, ypocriten, want ghi sijt ghelijc den vercierden graven, die van buten voer den menschen scoen schinen, van binnen sijn si vol been van doden luden ende alre onreynicheyt. Alsoe schijndi oec voerden menschen gherechtich, mer van binnen si di vol ypocrisien ende boesheyden.

We u, scriben ende Phariseen, ypocriten, ghi tymmert der propheten ende der gherechtigher grave ende verciert die ende segghet: Hadden wij in onser vader daghe gheweest, wij en waren niet ghesellen gheworden inder propheten bloetstortinghe, ende aldus sidi u selven een ghetuuch, dat ghi der gheenre kijnder sijt, die die propheten verslaeghen hebben. Ende vervullet ghi die mate uwer vader altoes! Serpenten ende slanghen gheslechte, hoe suldi ontgaen vanden oerdel der hellen?

Hier om, siet, ic seynde tot u propheten ende wisen ende scriben, ende van dien suldi daer sullic doden ende crucen ende van hem luden sullic gheselen in uwen synagoghen ende sulse vervolghen van steden tot steden, op dat op ju come al dat gherechtighe bloet, dat op der eerden ghestort is van dier tijt, dat Abel die gherechtighe sijn bloet storte, al tot Zacharias Barachias soens bloede toe, dien ghi versloeghet tusschen den tempel ende den altaer. Ic segghe u voerwaer: Alle dese sonden sullen comen op dit gheslechte.

Iherusalem, Iherusalem, du verslaeste die propheten ende steenste die tot di gheseynt sijn. Hoe ducke begheerde ic dine kijndere te vergaderen rechte als een henne hoer kuken vergadert onder hoer vloghele, ende du en woldestes niet. Siet, u hues sal woest ghelaten werden. Ic seg u: Ghi en sult mi voert meer niet sien tot dat ghi segghet: Ghebenedijt is hi, die daer comet inden name des Heren.