die werlt, soe salmen segghen dat se dat ghe\daen hevet in dier ghedenckenisse. Doe ghinc een vanden twaelven en weech, die Judas Scarioth hiete, totten princen der priesteren ende sprac tot hem: Wat wildi mi gheven ende ic sallen u over leveren? Ende si gheloefden hem dertich penninghe. Ende van dier tijt voert sochte Judas stonde daer toe, dat hien over leverde.
Des irsten daghes, doe hoer hoechtijt aenstont, quamen die jongheren tot Ihesum ende seyden: Waer wiltu, dat wij di bereyden dinen Paeschen teten? Ende Ihesus seyde: Gaet in die stat toe enen ende segghet hem: Die meyster seyt: mijn tijt is hier nae bi, mitti maecke ic minen Paeschen mit minen jongheren. Die jongheren deden als hem Ihesus beval ende bereyden den Paeschen.
Doet avont was, ghinc hi sitten mit sinen twalf jongheren. Ende doe si aten, seyde hi hem: Ic segghe u voer waer, dat een van u mi verraden sal. Doe worden si seer bedroevet ende een yeghelic began te segghen: Heer, bin ic dat? Ende hi antworde ende seyde: Die die hant mit mi in die scotel steect, die is hi, die mi verraden sal. Die sone des menschen gaet als ghescreven is: wee dien menschen, van wien des menschen sone verraden sal werden. Het waer hem goet, hadde die mensche niet gheboren gheweest. Judas antworde, die hem verriet, ende seyde: Meyster, bin ic dat? Hi antworde hem: Du hebstet gheseyt. Doe si hoer aventmale deden, nam Ihesus dat broet ende ghebenedidet ende bracket ende gaeft sinen jongheren ende seyde: Neemtet ende etet, dat is mijn lichame. Den kelic nam hi oec ende danckede sinen vader ende gaffen hem ende seyde: Drinket alle van desen, want dit is mijn bloet des nuwen testaments, dat uut ghestort sal werden voer vole menschen in verlatenisse der sonden. Ic segghe u, dat ic voert meer niet drinken en sal van deser vruchten des wijngarts tot dien daghe toe, als icken niewe mit u drinken sal in mijns vader rijc.
Doe si hoer gracie gheseget hadden, ghinghen si uutten berghe van Oliveten.
Doe seyde Ihesus tot hem: Alle soldi scande liden in mi in deser nacht. Het is ghescreven: Ic sal den herde slaen ende die scape des cudden sullen ghestroyet werden. Nae dat dat ic verresen bin, sal ic u voergaen in Galileen. Petrus antworde hem: Ende al worden si alle ghescandalizeert in di, ic en sal nummermeer ghescandalizeert werden. Ihesus antworde hem: Voerwaer segic di, dattu in deser nacht, eer die haen crayen sal, soe saltu mi driewerf verloghenen. Petrus seyde: Al waert dat ic mit di sterven moeste, ic en sal dijns niet missaken. Ende des ghelikes seyden alle die jongheren.
Doe quam Ihesus mit hem in een darpe, dat hiet Getsemani, ende sprac tot sinen jongheren: Sit hier tot dat ic gaen sal ende beden, ende nam Petrum mit hem ende twe Zebedeus kijnder ende began te droeven ende zwaermoedich te wesen. Doe seyde hi hem: Mijn ziel is bedroevet al totter doet, liedet ju hier ende waket mit mi. Ende hi ghinc uut een luttel van daen viel hi neder in sijn aenschijn ende seyde: Vader mijn, oft moghelic is, soe gae dese kellec van mi. Nochtan niet als ic wille mer als du wilste. Doe quam hi tot sinen jongheren ende vantse slapende ende seyde tot Petrum: Ist aldus, en mochti niet een ure mit mi waken? Waket ende bedet, op dat ghi in gheenre becoringhe verwonnen en werdet. Die gheest is bereyt, mer dat vleysche is cranc. Anderwerf noch eens ghinc hi van danne ende bat ende seyde: Vader mijn, en mach dese kelic niet van mi gaen, ic en sallen drinken, soe ghewerde dijn wille. Ende quam weder ende vant se slapende, want hoer oghen waren bezwaert. Noch liet hie se ende ghinc en wech ende bat dorde werf dat selve ghebet. Doe quam hi toe sinen jongheren ende seyde hem: Slapet nu ende rustet. Siet, die tijt sal naken ende des menschen sone sal over ghelevert werden inden handen der sunders. Staet op, laet ons gaen. Siet, hi sal comen, die mi verraden sal.
Doe hi noch
Auteursrechtelijk beschermd