Nieuwe testament (Noordnederlandse vertaling)

VIII

In dien daghen anderwerf, doe daer een grote scare was mit Ihesu ende niet teten en hadden, doe riep hi sine jongheren tot hem ende seyde hem: Mi ontfarmt over die scare, want siet, si liden mi ende het is nu drie daghe, ende si en hebben niet teten, ende laet ic se vastende te huus gaen, si sullen ontbliven inden weghe, want sommich van hem sijn van verre ghecomen. Ende sijn jongheren antworden hem: Wan soude yement dese versaden moghen mit broede inder woesteinen? Ende hi vraghede hem: Hoe menich broet heb di? Si seyden: Seven. Ende hi gheboet der scaren, dat si op die eerde saten. Ende hi nam die soven brode ende dede gracie ende brac se ende gafse sinen jongheren, dat si se der scaren voerleyden, ende si leydense hem voer. Si hadden oec een luttel visschelken, ende die ghebenedide hi ende gheboet dat mense hem voerrichtede, ende si aten ende sijn versaed, ende si namen op vanden stucken die daer overbleven, zeven mande. Der gheenre die daer aten, was bina vier dusent. Ende hi lietse, ende rechtevoert clam hi in een scip mit sinen jongheren ende quam int lant van Dalmanuta.

Die Phariseen ghinghen uut ende begonden te vraghen mit hem, ende eyscheden van hem een teyken vanden hemel ende becoerden hem. Ende hi versuchte inden gheest ende seyde: Waerom sueket dit gheslechte een teyken? Ic segghe u voerwaer: Desen geslechte en sal gheen teyken ghegheven werden. Ende hi lietse ende clam ander werf in een scip ende voer heen over dat meer.

Si vergaten broet te nemen ende en hadden mer een broet mit hem inden scepe. Hi gheboet hem ende seyde: Siet ende hoedt u vanden heffen der Pharizeen ende van Herodes desem. Si dochten ende spraken tot malcanderen: Dit seghet hi daer om, want wij gheen broet en hebben. Ihesus keende dat ende seyde hem: Waerom dencti daer op, want ghi gheen broet en hebt? Keendi noch niet noch en verstaet? Hebdi noch ju herten verblint? Hebdi oghen ende en siet niet, hebdi oren ende en hoert niet? En ghedenct ju niet, doe ic die vijf broede brac onder vijf dusent menschen, hoe vole corve ghi opbuert, vol van relive? Si seyden: Twaelf. Doe ic soven brode onder vierdusent menschen brac, hoe menighe mande vol stucken naemdi daer af op? Si seyden: Soven. Ende hi seyde hem: Hoe en verstadi noch niet?

Si quamen tot Bethsayda. Doe brochten si enen blinden tot hem ende baden hem, dat hien ruerde. Ende hi nam des blijndenmans hant ende leydene buten der steghen ende spekelde in sijn oghen ende dede sijn hant daer op ende vraghede hem, of hi yet saghe. Ende hi sach op ende seyde: Ic sie menschen wanderen als bome. Daer nae dede hi anderwerf sijn hant op sijn oghen, ende hi began te sien. Ende hem is weder ghegheven, dat hi alle dinc claerliken sach. Doe seynde hien in sijn huus ende seyde: Ganc in dijn huus, ende gaestu in die steghe, soe en segghes niement.

Ende Ihesus ghinc uut ende sijn jongheren in die casteel Cesarie Philippi. Inden weghe vraghede hi sinen jongheren ende seyde: Wien segghen die menschen dat ic been? Si antworden ende seyden: Sommich segghen: Du biste Johannes Baptista, sommich, dattu bist Helyas, sommich, dattu bist als een vanden propheten. Doe seyde hi tot hem: Wie segdi, dat

[fol. 25v]

ic bin? Petrus antworde hem ende seyde: Du bist Cristus. Ende hi verboet hem, dat sijt niement en seyden van hem.

Ende beganse te leren, dat des menschen soen toe behoert vole te liden ende wederproeft te werden vanden olsten ende vanden hoechsten priesteren ende vanden scriben ende verslaghen te werden ende nae drien daghen te verrisen, ende sprac dat woert apenbaerlic. Petrus namen tot hem ende began hem toe berispen. Hi keerde hem um ende sach sijn jongheren ende dreyghede Peter ende seyde: Sathanas, ganc achter nae mi, want du en smaecste niet dat Gods is, mer dat der menschen is.

Doe riep hi die scare te samen mit sinen jongheren ende seyde: Soe wie mi volghen wil, verlochene sijns selves ende neme op sijn crues ende volghe mi. Soe wie sijn ziele behouden maken wil, die salse verliesen; soe wie sijn ziele verlieset om mi ende um der ewangelien, die salse behouden maken. Wat batet den menschen, of hi al die werlt wonne ende sijnre zielen scade duet? Of wat wissel sal die mensche voer sijn ziel gheven? Soe wie mi ende mijn woerde beliet in dit overspelende ende sundighe gheslechte, dien sal die sone des menschen belien, als hi coemet in die glorie sijns vader mit sinen enghelen.

Ende hi seyde hem: Ic segghe u voer waer: Hier sijnre sommich van die hier staen, die den doot niet smaken en sullen, si en sullen ierst dat rike Gods sien comende in der moghentheyt.