XIIII
Twe daghe hier nae wasset Paeschen ende datmen gheen broet en at, dat gheheven was. Ende die overste priestere ende die scriben sochten, hoe si hem mit scalcheyden mochten vanghen ende doden, ende seyden: Niet in den feestdaghe, op dat inden volc ghene gherucht en worde.
Ende doe Ihesus in Bethanien was ende in Symons des melaetschen mans huus sat ten eten, quam een wijf, die een alabaster mit eenre hande duerbaerre salven hadde, ende brac dat alabaster ende stortese op sijn hoeft. Doe wasser daer sommich, die dat in onwerde namen ende spraken onder hem zelven: Waer um is dit verlies van deser salven ghesciet? Men mochte dese salve vercoft hebben meer dan om driehondert penninghe ende den armen ghegheven. Ende alle grimden si op hoer. Ihesus die seyde: Laetse. Waerom sidi hoer lastelic? Si hevet een guet werc in mi ghewracht. Want die armen hebdi altoes mit u, ende wanneer ghi wilt, moechdi hem guet doen, mer mi en suldi altoes niet hebben. Dat si had, dat heft si ghedaen, si heft minen lichame inder salvinghen bereyt te begraven. Ic segghe u voerwaer: Soe waer dit ewangelium ghepredict wort in al die werlt, soe salment vertellen, dat sijt in die ghedenckenis der begravinghen ghedaen heeft.
Ende Judas Scarioth, een vanden twaelfven, ghinc en weech totten oversten priesteren, op dat hien hem verriet. Doe si dat hoerden, worden si blide ende beloefden hem ghelt te gheven. Ende hi sochte, hoe dat hien gadelic mocht overleveren.
Ende des irsten daghes der hoechtijt, doe si den Paeschen offerden, seyden sijn jongheren tot hem: Waer wiltu, dat wij gaen ende bereyden di dinen Paeschen teten? Doe seynde hi twe van sinen jongheren ende seyde hem: Gaet in die stat ende een mensche, die een vlessche waters draghet, sal u ghemoeten; volghet hem, ende soe waer hi ingaet, segghet den here des huses: Die meyster seyt: Waer is mijn vodinghe, waer sal ic den Paeschen mit minen jongheren eten? Ende hi sal u wisen een groet eetcamer toe ghemaect. Bereyd dat ons aldaer. Ende sijn jongheren ghinghen henen ende quamen in die stat ende vondent als hi hem gheseyt hadde ende bereyden den Paeschen.
Doet avont was, quam hi mitten twaelven. Ende doe si saten ende aten, seyde Ihesus: Ic segghe u voerwaer, dat een van u mi verraden sal, die mit mi etet. Doe begonden si hem te bedroeven ende seyden hem elc bi sonderlinghe: Bin ic dat? Hi antworde hem: Een vanden twaelven, die die hant mit mi in die scotel stect. Ende die sone des menschen gaet als ghescreven is van hem, mer wee dien mensche, daer die sone des menschen af verraden sal werden. Het waer hem guet, hadde die mensche niet gheboren ghewest.
Ende doe si aten, nam Ihesus dat broet ende ghebenedidet ende bracket ende gaft hem ende seyde: Etet, dat is mijn lichame. Ende hi nam den kellic ende dede gracie ende hi gaffen hem ende si dronken alle daer af. Ende hi seyde hem: Dit is mijn bloet des nieu testaments, dat voer vole menschen uut ghestort sal werden. Ic segghe u voerwaer, dat ic voertaen niet drinken en sal vander vruchten des wingaerdes tot dien daghe, dat icken niwe drinken sal in dat rijke Godes.
Ende doe si dat lof gheseyt hadden, ghinghen si uut inden berghe der oliven.
Ende Ihesus seyde hem: Alle soldi ghescandalizeert werden in mi in deser nacht, want het is ghescreven: Ic sal den heerde slaen ende die scape sollen ghestroyet werden. Mer nae dat ic op sal verrisen, sal ic voer ju gaen in Galileen. Petrus seyde tot hem: Ende al worden si alle ghescandalizeert, mer ic niet. Ihesus antworde hem: Ic segghe di voerwaer, dattu huden in deser nacht, eer die hane twewerve crayet, saltu mi driewerve verlochenen. Ende hi seyde daer noch meer toe: Ende al wordet noet, dat ic mitti te gader moeste sterven, ic en sal dijns niet versaken. Des ghelikes seyden si oec alle.
Ende si quamen in een hof, dat hiet Getsemani. Do seyde hi tot sinen jongheren:
Auteursrechtelijk beschermd