Nieuwe testament (Noordnederlandse vertaling)

III

In den vijftienden jaer, doe Tyberius keyser was, doe Pontius Pylatus regierde dat lant van Judeen ende Herodes een prince was over Galileen ende Philippus, sijn bruder, een prince was over Isurien ende over dat rike van Traconiten, ende Lizania een prince was over Abilien, ende doe Annas ende Cayphas bisscopen waren, doe quam dat wort Godes op Johanne Zacharias sone, inder woestinen. Ende hi quam in al dat rijc der Jordanen, predikende dat doepsel der penitencien in verlatenissen der sonden, als ghescreven is inden sermoen boec Ysayas des propheten: Een stemme des roepens in der woestinen: Maect bereet den weech des Heren, maecket recht sijn toepade. Eelc dal sal vervult werden ende alle berch ende hovel sal vernedert werden ende alle hovele sollen gheslicht werden ende dat overste in slechten weghe, ende alle mensche sal sien die behoudenisse Godes.

Doe seyde hi totten scaren, die uut ghinghen um ghedoept te wesen van hem: Slanghen gheslacht, wie hevet u gheapenbaert, te vlien vanden toecomenden toerne? Daerum doet werdighe vrucht der penitencien ende en beghinnet niet te segghen: Wij hebben Abraham tot enen vader. Ic segghe u, dats God mechtich is van desen stenen Abrahams kijnder te verweckenene. Nu is die bile aen die wortel der bomen gheset. Daer um alle boeme die gheen vrucht en brenghet, sal men op houwen ende in dat vuer werpen.

Doe vraechden hem die scaren ende seyden: Wat sollen wij dan doen? Hi antworde hem ende seyde: Die twe rocke hevet, gheeft den ghenen die niet en hevet, ende die spise hevet, die doe des ghelijcs. Doe quamen daer apenbaer sunders um ghedoept te warden ende seyden tot hem: Meyster, wat sullen wij oec doen? Hi antworde: Niet meer dan u gheset is en eyschet. Doe vragheden hem die ridders ende seyden:

[fol. 34r]

Ende wat sollen wij oec doen? Ende hi seyde hem: En bedrucket niement noch en doet gheen onrecht ende weset vernoeghet mit uwen soude.

Doe alle dat volc waende ende si allen dochten in horen herten van Johanne, dat hi licht Cristus ware, doe antworde hem Johannes ende seyde: Ic doepe u inden water, want nae mi coemt een sterker dan ic, wies ic niet werdich en bin, die rieme van sinen ghescoete te ontbijnden. Hi sal u doepen inden Heylighen Gheest ende inden vuere, wees wayer in sijn hant wesen sal ende sal suver maken sijn floer ende sal den weyt in sijn scuer vergaderen ende sal dat caf verbernen in een vuer, dat nummermeer gheleesschet en sal werden.

Veel ander dinghen was hi lerende ende radende den volc. Doe Herodes die prince wart berispet van hem als van Herodiade sijns brueders wijf ende van alle den anderen, dat Herodes dede, dit dede hij noch boven al, dat hi Johannem inden kerkenaer sloet.

Het ghesciede, doe allet dat volc ghedoept wart ende Ihesus ghedopet was ende sijn ghebede dede, dat die hemel wart open ghedaen ende die Heylighe Gheest daelde neder in hem in een lichamlike ghedaente als een duve, ende een stemme was vanden hemel ghehoert: Du biste mijn vercoren sone, mi hevet in di behaghet.

Ende Ihesus was beghinnende als van dertich jaren dat men waende, dat hi Josephs sone ware, hi was Hely, hi was Mathat, hi was Levi, hi was Melchi, hi was Janne, hi was Joseph, hi was Mathathie, hi was Amos, hi was Naum, hi was Elli, hi was Nagge, hi was Naat, hi was Mathathie, hi was Semei, hi was Joseph, hi was Juda, hi was Johanna, hi was Resa, hi was Sorobabel, hi was Salathiel, hi was Neri, hi was Melchi, hi was Addi, hi was Cosan, hi was Elmodam, hi was Her, hi was Jesu, hi was Elieser, hi was Jorim, hi was Mathat, hi was Levi, hi was Symeon, hi was Juda, hi was Joseph, hi was Jona, hi was Eliachim, hi was Melchi, hi was Menan, hi was Mathatha, hi was Natan, hi was David, hi was Jesse, hi was Obeth, hi was Boos, hi was Salmon, hi was Naason, hi was Aminadap, hi was Aram, hi was Esrom, hi was Phares, hi was Jude, hi was Jacob, hi was Ysaac, hi was Abraham, hi was Thare, hi was Nathor, hi was Seruch, hi was Raghan, hi was Phales, hi was Eber, hi was Sale, hi was Cainan, hi was Arphaxat, hi was Sem, hi was Noe, hi was Lamech, hi was Matusalem, hi was Enoch, hi was Jareth, hi was Malaleel, hi was Cainam, hi was Enoch, hi was Seth, hi was Adam, hi was Gods. Deser gheslechte sijn lxxv.