saltu niet becaren.
Ende doe alle die becaringhe voleyndet was, sceyde tier tijt die viant van hem.
Ende in die cracht des gheestes keerde Ihesus weder in Galileam, ende een gheruchte ghinc uut van hem over al dat rijc. Ende hi leerden in hoer synagoghen ende hi wart groet ghemaect van hem allen.
Doe quam hi te Nazareth, daer hi ghevoedet was, ende ghinc des saterdaghes in die synagoghe na sijnre ghewoenten ende stont op um te lesene. Ende Ysayas des propheten boec is hem ghegheven, ende doe hi dat boec um keerden, vant hi een stede, daer ghescreven was: Die gheest des Heren over mi, daer um heeft hi mi ghesalvet, den armen te boetscappen hevet hi mi gheseynt, te ghenesen die te wreven van herten, verlosinghe te prediken den ghevanghenen ende den blijnden dat sien, die ghebroken sijn, quijt te laten ende te prediken dat ontfanclic jaer des Heren ende den dach des wedergheves.
Ende doe hijt boeck te gader ghevolden hadde, gaf hiet den knecht weder ende sat. Ende alder menschen oghen inder synagoghen waren siende ende merkende in hem. Doe began hi tot hem te segghen: Huden is dese scrifture vervult in uwen oren. Ende alle gavense hem een ghetughe ende verwonderen inden worden der gracien, die uut sinen monde ghinghen, ende seyden: En is dit niet Josephs sone? Ende hi seyde hem: Ghi solt mi ummer dese ghelijcheit segghen: Meyster, maec di selven ghesont. Hoe vole dat wij ghehoert hebben, dattu ghedaen hebste in Capharnaum, doe oec al hier in dijn lantscap. Ende hi seyde: Ic segghe u voerwaer, dat niement propheet ontfanghen is in sijn eyghen lant. Ic segghe u inder waerheyden, dat voel weduen waren in Israhel in Helyas tiden, doe die hemel ghesloten was drie jaer ende sees maende ende in allen landen doe groet hongher was ende tot gheen van dien en was Helias ghesant dan in Sarepta Sydonorum tot enen wive, die wedue was. Ende het waren vole melaetschen in Israhel onder Helizeo den propheet, ende niement van hem en was ghesont ghemaect dan Naaman Sirus. Ende alle die in die synagoghe waren ende dit hoerden, worden vervult mit toerne ende stonden op ende worpenen uter stat, ende leydene totten overste vanden berghe, daer hoer stat op ghetymmert was, dat sien neder solden werpen. mar hi ghinc doer die middel van hem allen, ende daelde neder in Capharnaum, een stat van Galileen, ende daer leerde hiese op die sabbete. Ende si verwonderden hem in sijnre leringhen, want sijn woert was in moghentheyden. Ende inder synagoghen was een mensche, die den onreynen gheest hadde ende riep mit luder stemmen ende seyde: Laet, Ihesu Nazazene, wats ons ende di? Bistu ghecomen om ons te verderven? Ic keenne dattu bist een heylich Godes. Ende Ihesus berispdene ende seyde: Swich ende ganc van hem uut. Ende doe hi den viant uut gheworpen hadde, ghinc hi van hem in die middel ende hem en deerden niet. Ende in hem allen wart een ontsien ende spraken te gader ende seyden: Wat is dat woert? Want hi in machten ende in crachten den onreynen gheesten ghebiet ende si gaen uut. Ende die name van hem wart ghecondicht in allen steden van dien rijcke.
Ihesus stont op uter synagoghen ende ghinc in Symons huus. Symons swegher was bevanghen mit groten saghe ende si baden hem voer hoer. Ende hi stont boven hoer ende gheboet den saghe ende sie wart ghesont. Ende rechte voert stont si op ende diende hem luden.
Doe die sonne was onderghegaen, alle die ghene die zieken hadden van alrehande qualinghe, brochten se tot hem. Ende hi leyde hem allen die hant op ende maectense ghesont. Van hem vole ghinghen viande uut ende riepen ende seyden: Du bist die sone Gods. Ende hi berispdese ende en lieter niet spreken, want si wisten dat hi Cristus was.
Doet dach was, ghinc hi uut in een woeste stede ende
Auteursrechtelijk beschermd