V
Het ghesciede, doe die scaren dronghen tot hem, op dat se dat woert Godes hoerden ende hi stont nevens die zee van Genezareth, sach hi twe scepe staende biden mere. Die visschers waren neder gheclommen ende wiesschen hoer nette. Doe clam hi in een scip dat Symons was, ende bat hem, dat hijt een luttel vanden over leyde. Ende hi sat ende leerde die scaren uten scepken. Doe hi dat spreken af liet, seyde hi tot Symon: Vaer in dat diepe ende bereyt uwe netten te vanghen. Ende Symon antworde ende seyde hem: Ghebieder, alle die nacht hebben wij ghearbeyt ende niet ghevanghen, mer in dinen name sal ic dat nette toe legghen. Ende doe si dat daden, vinghen si een overvlodighe menichte van visschen. Hoer nette scoerden ende si wencten den ghesellen, die in dat ander scip waren, dat si quamen ende holpen hem. Ende si quamen ende vervulden beyde die sceepkijn, dat si bina toe opten gronde ghinghen. Doe dat Symon Peter sach, viel hi voer Ihesus knien neder ende seyde: Heer, ganc van mi, want ic bin een sundich mensche. Vrese bevinc hem ende alle die mit hem waren, in die vanghinghe der visschen die si vinghen, des ghelijcs Johannes ende Jacobus Zebedeus kijnder, die Symons ghesellen waren. Doe seyde Ihesus tot Symon: En wilt niet ontsien, van desen voert saltu menschen vanghen. Doe brochten si die scepe te lande ende lieten alle dinghen ende volgheden hem.
Ende het ghesciede, doe hi was in een stat, dat daer was een man, vol van malaetsheyden. Doe hi Ihesum sach, viel hi neder in sijn aensicht ende bat hem ende seyde: Heer, eest dattu wilst, du mogheste mi ghesont maken. Ende Ihesus reykede sijn hant uut ende ruerdene ende seyde: Ic wil, wes ghereynicht. Ende altehant ghinc die malaetsheyt van hem. Ende hi gheboot hem, dat hi niement en seyde, mer ganc ende toen di den priester ende offer voer dijn suveringhe dat Moyses gheboden hevet, hem tot enen ghetughe. Die meer ghinc seer om van dien ende vole scaren vergaderden, op dat sien hoerden ende ghesont ghemaect worden van hoerre siecten. Hi ghinc achterwarts in die woestine ende bedede.
Ende het ghesciede in een der daghen, dat hi sat ende leerde, ende daer saten Pharizeen ende leerers vander wit, die ghecomen waren uut allen castelen van Galileen ende Judeen ende Iherusalem. Ende die cracht des Heren was um hem luden ghesont te maken. Ende siet, manne brochten enen mensche in een bedde, die verghicht was, ende begherdene in te brenghen ende te legghen voer hem, ende en vonden niet, tot wat siden si hem inbrenghen mochten um der scaren wille. Doe clommen si op dat dacke ende doer die latten lieten sien neder inden bedde in die middel voer Ihesum. Welker lude ghelove doe hijt sach, seyde hi: Mensche, dijn sonden sijn di vergheven. Ende die scriben ende die Phariseen begonden te dencken ende seyden: Wie is dese, die blasphemie spreect? Wie mach sonden vergheven dan God alleen? Want Ihesus hoer ghedachte wijste, antworde hi ende seyde tot hem: Wat dencti in uwen herten? Wat is lichter, te segghen: Dijn sunden werden di vergheven, of te segghen: Stant op ende wander? Op dat ghi wetet dat die sone des menschen macht hevet inder eerden die sonden te vergheven, soe seyde hi den verghichten menschen: Ic segghe di: Stant op ende boer op dijn bedde ende ganc in dijn huus. Ende rechtevoert stont hi op voer hem luden ende boerdet op, daer hi in lach, ende ghinc heen in sijn huus ende dancte Gode. Ende si worden vervult mit
Auteursrechtelijk beschermd