Ende alle die scare begherde hem te rueren, want een moghentheyt ghinc van hem uut ende maectese alle ghesont.
Ende mit opgheslaghenen oghen op sijn jongheren sprac hi: Salich sijt ghi, arme, want dat rijcke Godes is u. Salich sijt ghi, die nu honghert, want ghi solt versadet werden. Salich sijt ghi, die nu weent, want ghi solt lachen. Salich soldi wesen, als u die lude haten ende als si u versceyden ende lasteren ende uwen name en wech werpen recht als quaet om den sone des menschen.
Verblijt ende vervrouwet u in dien daghen, want siet, u loen is voel inden hemel. Al des ghelijcs deden den propheten hoer vaders.
Mer wee ju, riken, die uwen troest hebbet. Wee ju, die versadet sijt, want ghi solt hongheren. Wee ju, die lacht, want ghi solt wenen ende screyen. Wee ju, als u die lude wael spreken, des ghelijcs deden den propheten hoer vaders.
Mer ic segghe u, diet hoert: Minnet uwe viande ende doet hem goet, die u haten, sprect hem goet, die u quaet spreken, biddet voer die ghene die u persecucie doen. Ende wie di slaet aen die een kinnebacke, biedet hem die ander, ende soe wie die dijn cleet ontnemet, en wil hem oec dinen rocke niet verbieden. Ghif enen iegheliken, die di biddet, ende soe wie di dat dijn nemet, en eysches niet weder. Ende alsoe als ghi wilt, dat u die lude doen, doet ghi hem des ghelikes. Ende of ghi die ghene minnet, die u minnen, wat danc buert u daer af? Want die sunders minnen die ghene die hem minnen. Ende of ghi den ghenen guet doet, die u wel doen, wat danc buert u daer af? Dat doen oec die sonders. Ende of ghi onderlinghe den ghenen ghevet, daer ghijt af haept weder te ontfanghen, wat danc buert u daer af? Want die sonders verghiften die sonders um alsoe veel weder te ontfanghen. Mer u segghe ic: Minnet u viande ende doet hem wael ende ghevet onderlinghe, niet daer af wederhapende, ende groet sal u loen wesen inden hemel, ende ghi solt des alren oversten kijnder wesen, want hi is guedertieren over die ondancsommighen ende quaden.
Hier om weset ontfarmhertich, als u hemelsche vader ontfarmhertich is. En wilt niet ordelen ende ghi en solt niet gheordelt werden. En wilt niet verdoemen ende ghi en solt niet verdoemt werden. Verghevet ende u sal vergheven werden. Ghevet ende u sal ghegheven werden: een guede maet ende toeghedrucket ende opghehoept ende overlopende sollense gheven in uwen scoet. Mitter selver maten, daer ghi mede metet, sal u ghemeten werden.
Doe seyde hi hem een ghelijckenisse: Mach een blinde den blinden leyden? Vallen si niet beyde inden grave?
Die jongher en is niet boven sinen meyster. Elc sal volmaect wesen, is dat sake dat hi si als sijn meyster.
Wat siestu een stubbeken in dijns brueders oghe ende enen balc in dinen oghe en mercstu niet? Ende hoe moghestu dinen brueder segghen: Brueder, laet, ic sal dat caf uut dinen oghe werpen, ende du selve den balke in dinen oghe niet en sieste? Ypocrite, werp ierst den balke uut dinen oghe ende dan sich daer nae, dattu dat caf uut dijns brueders oghe brengheste.
Het en is gheen goet boem, die quade vrucht brenghet, noch gheen quaet boem, die goede vrucht brenghet, want elc boem is bekennet van sinen vruchten. Noch si en vergaderen vanden doerne vighen noch en sniden vanden buscholt gheen druven. Een goet mensche vanden goeden scatte [sijns herten] brenghet goet voert ende een quaet mensche brenghet quaet voert vanden quaden scat sijns herten. Want uut overvlodicheyt des herten spreket die mont.
Waer um heyt ghi mi heer, heer, ende en doet niet dat ic segghe? Een yeghelic die toe mi comet ende hoert mijn leer ende
Auteursrechtelijk beschermd