Nieuwe testament (Noordnederlandse vertaling)

VII

Doe hi alle sijn woerde gheeyndet hadde in des volcs oren, ghinc hi in Capharnaum. Een ridder, die een centurio was, hadde enen knecht die siec was ende was biden sterven, dien hi seer lief hadde. Doe hi hoerde segghen van Ihesu, seynde hi die olste der Joden tot Ihesum ende bat hem, dat hi quame ende maecten sinen knecht ghesont. Ende doe si quamen tot Ihesum, baden si hem vlitelic ende seyden, dat hijs werdich is, dattu hem doeste, want hi minnet onse volc ende heeft ons een synagoghe ghetymmert. Ihesus ghinc mit hem. Ende doe hi te hant niet verre vanden huus en was, seynde centurio sijn vriende tot hem ende seyde: Heer, en moye di niet, want ic bins niet waerdich, dattu onder mijn dac incoemste. Ende daer um en rekende ic mi selven niet waerdich, dat ic ghecomen hadde toe di, mer sech mit enen woerde ende mijn kijnt sal ghesont werden. Want ic been een mensche ende onder moghentheyt gheseet, ende ic hebbe ridder onder mi ende segghe desen: Ganc, ende hi gaet, ende enen anderen: Coem, ende hi coemet, ende minen knecht: Doe dat, ende hi doedt. Doe Ihesus dit hoerde, verwonderde hi hem ende keerde hem um ende seyde den scaren die hem volgheden: Ic segghe u voerwaer, dat ic in Israhel alsoe groet ghelove niet en vant! Ende si keerden weder te huus, die gheseynt waren, ende vonden den knecht die ziec was, ghesont.

Ende het ghesciede hier nae, dat hi ghinc in een stat, die Naim hiete, ende sijn jongheren ende een grote scare ghinghen mit hem. Doe hi der poerten vander stat nakede, brochtmen enen doden uut draghen, ende dat was sijnre moeder enighe kijnt ende si was een wedue, ende een grote scare uter stat mit hoer. Doe sie die heer sach, wart hi mit barmherticheyden op hoer beweghet ende seyde: En wil niet wenen. Ende hi trat toe ende ruerde dat, daer die dode in lach, ende dien droeghen, bleven staende, ende hi sprac: Jonghelinc, ic segghe di, stant op! Ende hi rees op ende ghinc sitten, die daer doet was, ende began te spreken, ende hi gaffen sijnre moeder. Vrese bevinc si alle ende si groetmaecten Gode ende seyden: Een groet propheet is onder ons op ghestaen, ende: God hevet sijn volc ghevandet. Ende dit woert ghinc uut in allen Judeen van hem ende over al omtrent dien rike.

Ende Johannes jongheren boetscapten hem van alle dit. Doe rieper Johannes twee van sinen jongheren ende seyndese tot Ihesum ende seyde: Bistuut die daer toecomende is, of verwachten wij enen anderen? Doe die manne ghecomen waren tot hem, seyden si: Johannes Baptista hevet ons gheseynt tot di, vraghende: Bistuut die toecomende is, of verbeyden wij enen anderen? In dier selver uren maecten hier voel ghesont van ziecheyden, van qualinghen ende van quaden gheesten ende voel blinden gaf hi dat ghesichte. Ende hi antworde ende seyde hem: Gaet ende weder boetscapt Johanni dat ghi ghesien ende ghehoert hebt, want die blijnde sien, die cropele wanderen, die melaetschen werden ghesuvert, die doven horen, die doden staen op, die armen werden inden ewangelie gheleert, ende salich is hi die in mi niet ghescandalizeert en wort.

Doe Johannes boden henen ghinghen, began hi te segghen van Johanne: Wat sidi uut ghegaen inder woestinen, te sien een riet vanden wijnde ghewayet te wesen? Mer wat sidi uutghegaen te sien? Enen menschen, mit sachten clederen ghecleedt? Siet, die in duerbaren cledinghen sijn ende in weelden, die sijn inder coninghe huse. Mer wat sidi uut ghegaen te sien? Enen prophete? Ic segghe u ummer, dat hi meerre is

[fol. 37r]

dan een propheet. Dit is hi, daer af ghescreven is: Sich, ic seynde minen enghel voer dijn aensicht, die dijn weghe voer di bereyden sal.

Ic segghe u, dat onder die kijnder der wiven en is gheen meerre propheet dan Johannes Baptista, ende die die minste is inden rike Godes, is meerre dan hi. Ende alle dat volc die dat hoerden, ende die publicanen die van Johannes ghedoept waren, rechtverdichden Gode. Die Pharizeen ende die gheleerde vander wit, die versmaden den raet in hem selven ende van hem niet ghedoept te wesen.

Wien sal ic hier um die menschen van desen gheslecht ghelijc heyten ende wien sijn si ghelijc? Si sijn ghelijc den kijnderen, die op die merct sitten ende spreken ende segghen tot malcanderen: Wij hebben ju ghesonghen ende ghi en hebt ons niet ghespronghen, wij hebben ghehantslaghet ende ghi en hebt niet ghescreyet.

Want Johannes Baptista quam ende en at broet noch en dranc wijn, ende ghi segghet: Hi hevet den viant. Die sone des menschen coemt etende ende drinkende, ende ghi segghet: Siet enen mensche, die een verslijnder is ende een wijndrinker ende der publicanen ende der sundere vrient. Ende die wijsheyt is gherechtverdighet van allen horen kijnderen.

Een vanden Pharizeen bat hem dat hi mit hem ate, ende hi ghinc in des Pharizeen huus ende ghinc sitten ten eten. Ende sich, een wijf, een sundersche, die in dier stat was, doe si wijste dat hi was gaen sitten in des Pharizeen huus, brocht si ene alabaster mit salven ende stont achter nevens sijn voete ende began sijn voete nat te maken mit tranen ende droghedese mitten hare van horen hoefde ende cussede sijn voete ende salvedese mit salven. Doe dat die Pharizeus sach, die hem ghenoedt hadde, sprac hi in hem selven ende seyde: Waer dit een propheet, hi soude ummer weten, wie ende hoe danich dat wijf is, die hem ruert, want si is een sundersche. Ende Ihesus antworde ende seyde tot hem: Symon, ic hebbe di wat te segghen. Ende hi seyde: Meyster, sech.

Een wokener hadde twee sculdeners. Die een was hem sculdich vijf hondert penninghe ende die ander vijftich. Doe sijs niet en hadden te betalen, liet hise beyde quijt. Wilc minnet hem hier um meer? Symon antworde ende seyde: Ic vermoede, dat die dien hi meer quijt liet. Ende hi seyde: Du hebste te recht gheoerdelt. Doe keerde hi hem totten wive ende seyde tot Symon: Siestu dit wijf? Ic quam in dijn huus, ende du en gaveste minen voeten gheen water, mer dese maecte mine voete nat mit tranen ende droghedese mit horen hare. Du en gaveste mi gheen cussen; dese vander tijt, dat ic in quam, en hevet niet opghehouden mine voete te cussen. Du en salveste mijn hoeft niet mit olye, dese hevet mijn voete mit salven ghesalvet. Daer um segghe ic di: Hoer warden vole sunden vergheven, want si hevet vole ghemint. Dien men min verghevet, die minnet min. Doe seyde hi tot hoer: Dine sonden werden di vergheven. Doe begonden si onder hem te segghen, die daer mede saten: Wie is dese, die oec die sunden verghevet? Hi seyde totten wive: Ganc in vreden, dijn ghelove hevet di ghesont ghemaect.