in wien werpen se uwe kijnder uut? Hier um sollen si uwe richters wesen. Ende eest dat ic inden vingher Gods die viande uut werpe, dan sonder twivel altehant coemt dat rike Gods in u. Wanneer een starc ghewapende sijn hof behoedt, alle dinghen sijn in vreden, die hi besittet. Mer eest dat een starker hem overcomet ende hem verwinnet, dan sal hi alle sijn wapen ontnemen, daer hi in betruwede ende sijn rove sal hi deylen.
Die niet mit mi en is, die is yeghens mi ende die niet mit mi en vergadert, die verstroyet.
Wanneer die onreyne gheest uten mensche gaet, dan wandert hi doer droghe stede, rust sokende, ende als hi gheen en vindet, seyt hi: Ic sal weder keren totten huse, daer ic uut ghinc. Ende als hi comet, vijnt hijt mit besemen ghesuvert. Ende dan gaet hi ende nemet tot hem soeven gheesten, die boser sijn dan hi ende ghaen daer in ende wonen daer. Ende die leeste des menschen sijn argher dan die ierste.
Het ghesciede, doe hi dit seyde, dat een wijf uter scharen [haer stemme] op hief ende seyde hem: Salich is die buuc, die di droech, ende die burste, die du sogheste. Ende hi seyde: Dat is alsoe: Salich sijn si, die dat wort Gods horen ende dat bewaren.
Doe die scaren te gader liepen, began hi te segghen: Dit gheslecht is een scalc gheslecht: het eyschet een teyken, ende gheen teyken en sal hem ghegheven werden dan dat teyken Jone des propheten. Want ghelijc dat Jonas een teyken was dien van Ninnive, alsoe sal wesen die sone des menschen desen gheslechte. Die coninginne van Oestlant Zuden sal opstaen inden oerdel mitten mannen van desen gheslechte ende salse verdoemen, want si quam van den eynden der eerden um te horen Salomons wijsheyt, ende siet, hier is een meerre dan Salomon. Die manne van Ninnive sollen opstaen inden oerdel mit desen gheslechte ende sollent verdoemen, want si penitencie deden um Jonas predikenghe, ende siet, hier is een meerre dan Jonas.
Niement en ontsteket een lanterne ende setse int verborghen noch onder een mudde, mer opten candelaer, op dat die ingaen dat licht sien. Die lanterne dijns lichams is dijn oghe. Ist dat oghe eenvoudich is, al dijn lichame sal claer wesen; ist dattet scalc is, al dijn lichame sal oec duuster wesen. Daer om sich, dat dat licht, dat in di is, ghene duusternisse en sijn. Ist dan, dat dijn lichame altemale claer sal wesen ende gheen deel der duusternis en hevet, dan salt al claer wesen ende als een lanterne des scinsels salt di verlichten.
Ende doe hi sprac, bat hem een Pharizeus, dat hi mit hem ate. Ende hi ghinc in ende sat neder ter tafelen. Die Phariseus began in hem selven te rekenen ende te segghen, waer um hi niet ghedwoghen en waer voer der maeltijt. Ende die Heer seyde tot hem: Ghi Pharizeen maect nu reyn dat buten den kellic ende nap is, mer dat binnen ju is, dat is vol roves ende boesheyden. Dwase, die dat maecte dat buten is, heeft hies oec niet ghemaect dat daer binnen is? Mer ghevet aelmessen van dat u over loept, ende siet, alle dinghen sollen u reyn sijn. Mer wee u, Pharizeen, want ghi tiendet mente ende rute ende al wermoes, ende ghi overtredet dat oerdel ende die minne Gods. Het behoerde dit te doen ende dat niet te laten. Wee ju, Pharizeen, ghi minnet die irste stoele in die synagoghe ende die gruetinghe opter merct. Wee ju, ghi sijt als grave die niet en bliken, ende die menschen die daer op wanderen, en wetens niet.
Doe antworden een vanden gheleerden inder wit ende seyde hem: Meyster, alstu dese dinghen segheste, doestu ons oec scande. Ende hi sprac: Ende
Auteursrechtelijk beschermd