Nieuwe testament (Noordnederlandse vertaling)

XIII

Summich waren daer inder tijt ende boetscopten dien vanden Galileuschen, wees bloet Pylatus ghemenghet hadde mit hoere offerhande. Ende hi antworde ende seyde hem: Waendi, dat die Galileuschen voer alle Galileuschen sonders gheweest hebben, want si solke dinghen leden? Dat en segic u niet, mer het en si dat ghi penitencie doet, alle soldi tegader bederven. Ende alsoe als die achtiene, daer die toern van Syloa op viel ende dode se, waent ghi, dat si sonders waren buten allen den ghenen die in Iherusalem waren wonende? Dat en segic u niet, mer het en si dat ghi penitencie hebt, alle soldi des ghelijcs bederven.

Doe seyde hi dese ghelijckenisse: Een mensche hadde enen vigheboem gheplant in sinen wijngaert ende quam ende socht vrucht in hem ende en vant niet. Doe seyde hi totten bouwer des wijngaerts: Sich, het sijn drie jaer, dat ic come ende soeke vrucht in desen vigheboem ende ic en vinde niet. Daer um houwen op. Waer toe sal hi oec die eerde besletten? Ende die bouman antworde hem ende seyde: Heer, laetten oec dit jaer thent icken umgrave ende mist daer aen werpe, ende brenghet hi dan vrucht, dats goet; brenghet hi gheen, hier naemaels salmen hem ophouwen.

Hi was lerende in hoer synagoghen op die sabbet. Ende daer was een wijf, die den gheest der ziecheyt achtien jaer ghehadt hadde, ende si was nederwerts ghecrommet ende en mochte te male niet opwarts sien. Doe se Ihesus sach, riep hi se tot hem ende seyde hoer: Wijf, du bist ontladen van dijnre ziecten, ende leyde sijn hant op hoer ende te hant wartse opghericht ende danckede Gode mit glorien. Doe antworde die prince vander synagoghen onwerdelike, dat Ihesus opten sabbet ghesont makede ende seyde der scaren: Het sijn sees daghe, daer in behoert te werken. Coemt daer um in dien daghen ende wert ghesont ende niet inden daghe des sabbets. Doe antworde die Heer tot hem ende seyde: Ypocriten, en ontbijnt niet een yeghelic sinen os of sinen ezel des sabbets vander cribben ende leytene te water? En moest men niet dese Abrahams dochter ontbijnden van desen bande opten dach des sabbets, die die viant achtien jaer ghebonden hadde? Ende doe hi dit sprac, scaemden hem alle sijn wederzaken, ende allet volc verbliden hem in allen dien die glorioselic van hem ghescieden.

Daer um seyde hi: Wien is dat rike Gods ghelijc? Ende wien salic dat ghelijc rekenen? Het is ghelijc den mostertsadeken, dat een mensche nam ende warpt in sinen hof, ende het wies ende het is gheworden een groet boem, ende die voghele des hemels

[fol. 42v]

rusteden in sinen telghen. Ende anderwerf seyde hi: Wien sal ic dat rike Gods ghelijc vermoeden? Het is ghelijc den hefsel dat een wijf nam ende bedecte dat int mele van drien maten coerns thent dattet al gheheven is.

Ende hi ghinc leren[de] doer steden ende castelen ende maecte den wech in Iherusalem.

Doe seyder een tot hem: Heer, offer luttel sijn die behouden sullen bliven? Doe seyde hi tot hem luden: Stridet integaen doer die enghe poerte, want ic segghe u, datter vole sullen soeken integaen, ende si en sullen niet moghen. Wanneer die huuswert inghegaen is ende die dore ghesloten hevet, dan suldi beghinnen buten te staen ende die doere te cloppen ende segghen: Heer, luuct ons op. Dan sal hi u antworden ende segghen: Ic en keenne u niet, wan ghi sijt. Dan suldi beghinnen te segghen: Wij hebben ghegheten ende ghedronken voer di ende in onsen straten hebstu gheleert. Ende hi sal u segghen: Ic en weet u niet, waen ghi sijt, sceydet van mi, alle werkers der quaetheyt. Daer sal wesen weninghe ende kneersinghe van tanden, als ghi sien sult Abraham, Ysaac ende Jacob ende alle die propheten in dat rijke Godes ende u uut gheworpen. Ende si sullen comen van oesten ende van weesten, van noerden ende van zuden, ende sullen sitten in dat rike Gods. Ende sich, si sijn die leeste, die die irste waren, ende si sijn die ierste, die die leeste waren.

In dien daghe quamen sommich vanden Pharizeen tot hem ende seyden: Ganc uut ende ganc van hier, want Herodes wildi doden. Ende hi seyde hem: Gaet ende segghet den vosse: Sich, ic werpe di viande uut ende ic maec ghesontheyden huden ende morghen, ende des dorden daghes wort dit volbrocht. Nochtan moet ic huden ende morghen ende daer nae volghende wanderen, want buten Iherusalem en ontfanghet hies niet enighen prophete te sterven. Iherusalem, Iherusalem, du verslaeste die propheten ende steenste die tot di gheseynt sijn. Hoe ducwile wolde ic dijn kijndere vergaderen als een heenne of voghele sijn neest onder die vederen, ende du en woudestes niet. Siet, u sal ghelaten werden u huus woest. Ic segghe u dat ghi mi niet sien en sult thent dattet come dat ghi segghen solt: Ghebenedijt is hi, die inden name des Heren comet!