di seyt: Ghif mi drinken, du soldeste licht van hem ghebeden hebben ende hi soude di licht levendich water ghegheven hebben. Doe seyde hem dat wijf: Heer, du en hebste niet in te putten ende die put is diep. Wan hebstu dan levende water? Bistu meerre dan onse vader Jacob, die ons den put gaf ende hi dranc daer uut ende sine kijnder ende sine beesten? Ihesus antworde ende seyde hoer: Eelc die van desen water drincket, sal anderwerve dorsten, mer die drincken sal vanden water, dat ic hem gheven sal, dien sal niet dorsten inder ewicheyt, mer dat water, dat ic hem gheven sal, dat sal werden in hem een fonteyne des springhenden waters in dat ewighe leven. Doe seyde dat wijf tot hem: Here, ghif mi dat water, op dat mi niet en dorste noch dat ic hier niet en come putten. Ihesus seyde haer: Ganc ende roep dinen man ende com hier. Dat wijf antworde ende seyde: Ic en heb ghenen man. Ihesus seyde hoer: Du hebste dat wael gheseyt, want du hebste vijf manne ghehad ende dien du nu hebste, die en is dijn man niet, daer in hebstu waer gheseyt: ic en hebbe ghenen man. Doe seyde hem dat wijf: Heer, als mi duncket, du bist een propheet. Onse vaders hebben aenghebedet in desen berch ende ghi segghet, dat te Iherusalem die stede is, daer men aenbeden moet. Ihesus seyde hoer: Wijf, gheloef mi dat, dat die ure comen sal, dat ghi noch te Iherusalem noch in desen berch aenbeden en solt. Ghi aenbedet dat ghi niet en weet, wij aenbeden dat wij weten, want die salicheyt is vanden Joden, mer die ure comet ende si is nu, wanneer die ghewarighe aenbeders den vader aenbeden sullen inden gheest ende inder waerheyt, want die vader die sueket alsulcdanighe, die hem aenbeden inden gheest ende inder waerheyt. Doe seyde hem dat wijf: Ic weet dat Messias comen sal, die Cristus heet. Wanneer hi comet, die sal ons alle dinghen segghen. Doe seyde Ihesus tot hoer: Ic bint, die mit di spreke.
Ende doe quamen sine jongheren ende verwonderden, dat hi mitten wive sprac. Nochtan en seyde hem niement: Wat soecstu? of: Wat sprecstu mit hoer? Doe liet dat wijf hoer canne daer ende ghinc in die stat ende seyde dien luden: Coemt ende siet enen mensche, die mi al gheseyt hevet dat ic ghedaen hebbe, en is hi niet Cristus? Si ghinghen uter stat ende quamen tot hem.
Sine jongheren vragheden hem ende seyden: Meester, etet. Hi antworde hem: Ic heb een spise te eten, die ghi niet en weet. Doe spraken die jongheren onderlinghe: Of hem yement teten ghebrocht hevet? Ihesus seyde hem: Mine spise is, dat ic des gheens wille doe, die mi gheseynt hevet, ende volbrenghe sijn werc. Segghet ghi niet, dattet noch vier maende sijn ende die bouwe coemt? Siet, ic segghe u: Heffet op u oghen ende besiet die rijke, want si sijn te hant wit totten bouwe. Ende die mayet, ontfanghet dat loen ende vergadert die vrucht int ewighe leven, op dat hi oec, die sayet, mede verblidet ende die mayet. In desen ist twoert waer, want het is een ander, die sayet, ende een ander, die mayet. Ic heb u gheseynt te mayen dat ghi niet bearbeyt en hebt. Ander lude hebben ghearbeyt ende ghi sijt in horen arbeyt inghetreden.
Uut dier stat gheloefdener voel Samaritanen in hem um dies wives woert, diet ghetughe gaf: Hi heeft mi alle dinghe gheseyt, die ic ghedaen hebbe. Doe die Samaritanen tot hem quamen, baden si hem, dat hi daer bleve. Ende hi bleef daer twee daghe. Ende um sine leringhe gheloveder vole te mere ende seyden den wive: Um dijnre talen wille en gheloven wij nu niet, want wij hebbent selve ghehoert ende wij weten dat dit waerlic is een behouder der werlt.
Nae
Auteursrechtelijk beschermd