hiete, maecte wase ende besmerde mine oghen ende seyde mi: Ganc tot nathatoriam Syloe ende wascht, ende ic ghinc ende wiescht ende sach. Si seyden hem: Waer is hi? Hi seyde: Ic en wetes niet. Doe brochten si hem, die blijnt gheweest hadde, totten Pharizeen. Het was een sabbet, doe Ihesus dat slijc maecte ende sijn oghen op loec. Anderwerf vragheden hem die Pharizeen, hoe hi siende wart. Hi seyde hem: Hi dede wase op mijn oghen ende ic wieschet ende ic sie. Doe seyden sommich vanden Pharizeen: Dese mensche en is van Gode niet, die den sabbet niet en behoet. Andere seyden: Hoe mach een mensche, die een sonder is, dese teykene doen? Ende een twistinghe was onder hem. Doe seyden si noch den blijnden: Wat saghestu van hem, die dijn oghen op dede? Hi seyde: Het is een propheet. Doe en gheloefdens die Joden niet van hem, dat hi blijnt gheweest hadde ende sach, thent si sijn olders riepen, die siende was gheworden, ende vragheden hem ende seyden: Is dit u zone, den ghi segghet, dat blijnt gheboren was? Hoe siet hi dan nu? Sijn olderen antworden hem ende seyden: Wij weten, dat dit onse kijnt is ende hi blijnt gheboren was, mer hoe dat hi nu siet, en weten wij niet of wie sijn oghen gheopent heeft, en weten wij niet. Vraghets hem zelven, hi heeft sijn ouder, hij spreke uut hem zelven. Dit seyden sijn olders, want si ontsaghen die Joden, want die Joden haddent doe overdraghen, soe wie hem belieden, dat hi Cristus ware, dien soude men uter synagoghen doen. Daer um seyden sijn ouders: Hi heeft sijn ouderdum, vraghes hem zelven.
Doe riepen si noch dien mensche, die blijnt gheweest hadde, ende seyden hem: Ghif Gode die eer, wij weten, dat dese mensche een sonder is. Doe seyde hi: Of hi een sonder is, des en weet ic niet; een weet ic, dats dat ic blijnt gheweest hebbe ende nu sie. Doe seyden si hem: Wat dede hi di? Hoe dede hi di die oghen op? Hi antworde hem: Ic seyt u nu ende ghi hebtet ghehoert. Wat wildiet anderwerf horen? Ende wildi oec sine jongheren werden? Si spraken hem qualiken ende seyden: Du biste sijn jongher, mer wij sijn Moyses jongheren. Wij weten, dat God Moyses toe ghesproken hevet, mer desen en weten wij niet, wan hi is. Hi antworde hem: In dien ist wonderlic, dat ghi niet en weet, wan hi is, ende hi mijn oghen op ghedaen heeft, want wij weten, dat Got die sonders niet en hoert, mer soe wie een oefener Godes is ende sinen wille doet, desen verhoert hi. Het en is vander werlt nie ghehoert, dat yemant eens menschen oghen op loec, die blijnt gheboren was. En waer dese van Gode niet, hien haddes niet moghen doen. Si antworden ende seyden hem: Du bist te male in sunden gheboren ende du leerste ons? Ende si worpen hem uut.
Doe Ihesus hoerde, dat sien uut gheworpen hadden ende doe hien ghevonden had, seyde hi hem: gheloefstu inden zone Godes? Hi antworde ende seyde: Heer, wie is hi, op dat ic in hem ghelove? Ende Ihesus seyde hem: Ende du hebste hem ghesien, ende die mitti sprect, hi ist selve. Ende hi seyde: Heer, ic ghelove. Ende hi viel neder ende aenbede hem. Ende Ihesus seyde hem: Ic bin ghecomen in dese werlt tenen oerdel, op dat die ghene die niet en sien, siende worden, ende die siende blijnt worden.
Ende het hoerden die mit hem waren vanden Pharizeen ende si seyden hem: Ende sijn wij oec blijnt? Ihesus seyde hem: Waerdi blijnt, ghi en haddes gheen sonde, mer nu segdi, dat ghi siet, daer um bliven uwe sonden.
Auteursrechtelijk beschermd