Nieuwe testament (Noordnederlandse vertaling)

IIII

Doe die totten volke spraken, quamen die priesteren ende die meysterscappe van den tempel ende die Saduzeen ende haddens rouwe, dat sijt volc leerden ende die verrissenisse in Ihesu kundichden uut den doden, ende sloghen die hande in hem ende settense in die vanghenisse tot des anderen daghes toe, want het was thans avent. Ende veel

[fol. 139v]

hoerre, die dat woert hoerden, gheloveden, ende tghetal der manne is gheworden vijf dusent.

Ende het ghesciede des morghens, dat haer princen vergaderden ende die oude ende die scriben in Iherusalem, ende Annas, prince der priestere, ende Cayphas ende Allexander ende Johannes ende alle die van den papen gheslechte weren, ende settense in den middel ende vragheden: In wat machten of in wat namen hebt ghy dit ghedaen? Doe seyde tot hem Petrus, die vervullet was van den Hilghen Gheest: Hoert, ghy princen des volcs ende ghy oude, ist dat wy huden met wel doen eens ziekens menschen verordelt waerden, daer dese ghesont in gheworden is, dat sy ju allen kundich ende alle den volke van Israel, dat hy in den name Ihesu Cristi van Nazaret, dien ghy ghecrucet hebben, dien God van den dode verwect heeft, in dien name staet dese ghesont voer u. Dit is die steen, die van ju timmeraers verworpen is, die inden hoefde der hoernen ghemaket is ende an gheen ander en is salicheyt, noch den menschen en is onder [den] hemel anders ghenen name ghegheven daer ons in behoert behouden te werden.

Doe sy saghen Petrus volstandicheyt ende Johannes ende vernamen dattet menschen weren sonder letteren ende ongheleert, verwonderden si ende sy kendense, dat sy mit Ihesum gheweest hadden, ende sy saghen den menschen staen mit hem, die ghesont ghemaket was, si en mochten daer niet weder segghen. Mer si gheboden, dat sy vyt den rade ginghen ende spraken te gader tot malc anderen ende seyden: Wat suelle wij desen menschen doen? want overmids hem is een openbaer teyken ghesciet alle den ghenen die toe Iherusalem wonen, het is openbaer ende wy en moghens niet loghenen. Mer op dattet onder den volke niet meer vermaert en waerde, laet se ons drieghen, dat sy voert an meer ghenen menschen en spreken in dien name. Ende sy riepense ende verbodent hem, dat sy te mael niet en spraken noch en leerden in den name Ihesu. Mer Petrus ende Johannes antworden ende seyden tot hem: Ist gherecht inden anghesichte Gads ju billiker te horen dan Goede? Ondersceyt dat selve. En moghe wy die dinghe niet spreken, die wy ghehoert hebben ende ghesien hebben? Ende al dreyghende lieten sy sie ende en vonden niet, hoe si sie pinighen mochten om dat volc, want si makeden alle openbaer wat daer ghedaen was in dien dat daer gheviel. Want die mensche, daer dit teyken der ghesondicheyt in schiede, die was van viertich jaren ende meer.

Mer doe sy laten gaen waren, quamen sy toten haren ende boetscapten hem, hoe voel die prince der priesteren ende die oelde gheseyt hadden. Doe sijt ghehoert hadden, heven sy die stemme eendractelich op ende seyden: Du Heer, die hemel ende eerde ghemaket hebste ende die see ende alle dinghe die daer in sin, die vyt den Hilghen Gheest doer den mont ons vaders, dijns kints Davids, ghesproken hebste: Waer om hevet dat volc begrimmet ende die luede ydelheden ghedocht? Die coninghe der eerden sijn by ghestaen ende die princen

[fol. 140r]

quamen te gader in een yeghens den Here ende yeghens sinen Cristum.

Want sy sijn waerlich in deser stat vergadert theghens Ihesum, dijn hilghe kint, dien du ghesalvet hebste, Herodes ende Pontius Pylatus mitten heydenen ende mitten volke van Israel, die dinghe te doen, die dijn hant ende dijn raet te rade gheworden is te ghesciene. Here, sych nu in haer dreyghinghe ende ghif dinen knechten mit alre coenheyt die woerde te spreken, in dien daer du dijn hant in uutreckeste ghesontheden ende teykene ende wondere te ghesciene overmids den name dijns hilghen kints Ihesu. Ende doe sy ghebedet hadden, bevede die stede, daer sy in vergadert weren, ende sij sijn alle vervullet van den Hilghen Gheest ende spraken mit ghetroestheden dat woert Gods.

Ende der veelheyt der ghelovender was een herte ende een siele ende nieman van hem luden dat hi besat en seyde yet sijn te wesen, mer alle dinghe waren hem ghemeyn. Ende in groter moghentheden gaven die apostelen tghetughe der verrisenisse ons Heren Ihesu Cristi, ende grote gracie was in hem allen. Noch daer en was oec nieman arm onder hem luden ghebrec hebbende, want hoe vele besitters der ackeren of der huse datter waren, sy vercochtent ende brochtent ghelt daer of ende leydent voer der apostelen voete, ende si deyldent elkermalc alsoe alst enen yegheliken noet was.

Ende Joseph, die van den apostelen toe ghenaemt is Barrabas, dat beduyt een soene des troestes, vyt Cypers, want hy enen acker hadde, vercocht [hine] ende brochte dat ghelt ende leydet voer der apostel voete.