Nieuwe testament (Noordnederlandse vertaling)

VII

Daer nae sach ic vier enghelen staende op die iiii hoken der werlt ende hielden die winden der eerden, dat si daer niet op wayen en solden noch op die zee noch in ghenen boem. Ende ic sach enen anderen enghel op climmen van der sonnen op ghanc, die dat teyken des levenden Gods hadde, ende hi riep mit luder stemme den vier enghelen dient ghegeven is toe scaden der eerden ende der zee, ende seyde: En wilt der eerden ende der zee noch den bomen niet deren thent wy ons Godes knechten in haren voer hovede gheteykent hebben.

Ende ic hoerde tgetal der gheenre die gheteykent sijn c^m xliiii^m ende van allen gheslechten der kinder van Israel. Van Judas gheslechte isser twelef dusent gheteykent, van Rubens gheslachte isser xii^m gheteykent, van Gads gheslachte isser xii^m gheteykent, van Assers gheslechte isser xii^m gheteykent, van Neptalims gheslachte isser xii^m gheteykent, van Manasses gheslachte isser xii^m gheteykent, van Simeons gheslachte isser xx^m gheteykent, van den gheslachte Levi isser xii^m gheteykent, van Ysachars gheslachte isser xii^m gheteykent, van Sabulons gheslachte isser xii^m gheteykent, van Josephs gheslachte isser xii^m gheteykent, van Benyamins gheslachte isser xii^m gheteykent.

Daer nae sach ic ene grote scare, die nieman tellen en mochte, uyt allen heydenen gheslachten ende volke ende tonghen staende voer den throne in der theghenwordicheyt des lams, mit witten stolen omme ghehanghen ende palmen in haer hande, ende sie riepen mit groter stemmen ende si seyden:

Heyl si onsen Gode, die opten throne sit, ende den lamme!

Ende alle die enghelen stonden inden ommeringhe des thrones ende der oeldere ende der vier diere, ende si vielen op haer aensichte neder voer den throne ende aenbeden Gode ende seyden:

Benedijnghe ende claerheyt ende wijsheyt ende danc der ghenaden ende ere ende doghet ende starcheyt si onsen Gode in ewen toe ewen.

[fol. 167r]

Amen.

Ende een van den oelden antworde my ende seyde: Wie sijn dese, die mitten witten stoelen ommeghehanghen sijn, wie sin si, van waen sin si ghecomen? Doe seyde ic hem: Mijn here, du weetstet. Ende hi seyde my: Dit sin si, die uyt groter droefheyt ghecomen sijn, ende hebben haer stolen ghewasschen ende wit ghemaket in den blode des lams. Daer om sijn si voer den throen Godes ende dienen hem nacht ende dach in sinen tempel, ende die in den throen sit, woent op hem. Hem en sal hongheren noch dorsten voert an, noch op hem en sal sonne of enighe hetten vallen, want dat lam salse regiren, dat in den middel des throens is, ende salse uyt leyden totten fonteynen der wateren des levens, ende God sal alle tranen of wisschen van horen oghen.