noch en ghenen boem quetsen en solde dan alleen die menschen, die Godes teyken in haren voer hoefden niet en hebben. Ende hem is ghegeven, niet dat si se verslaen solden, mer dat si ghecruyst solden waerden vijf maende, ende haer crusinghe is als die crusinghe eens scorpioens, als hi den menschen slaet. Ende in dien daghe sullen die menschen die doet soeken, ende en sullenre niet vinden, ende si sullen begeren toe sterven, ende die doet sal van hem vlien. Ende die ghelikenisse der worme, die coerenbiters hieten, weren ghelijc den peerden die bereyt sijn in den stride, ende op haer hoveden recht alse cronen ghelike den golde, ende haer aensichte alse aensichte der menschen, ende si hadden haer alse haer der wiven ende haer tande waren als der lewen tande, ende si hadden halsberghe alse yseren halsberghe ende stemmen haere vloghelen recht als die stemme der waghenen van veel peerden die in den stride lopen. Ende si hadden sterten ghelijc den scorpionen ende in haren sterten waren anghelen. Haer macht was den menschen toe deren vijf maende lanc. Ende si hadden enen enghel des afgronts boven hem tot enen coninghe, dien sijn name in Ebreuscher talen is Abadon ende in Griexer talen Apollion, ende in Latijnscher talen heeft hi enen name een verderver of een eynde maker.
Dat een wee is en wech ghegaen ende sich, noch comener twe na desen.
Ende die seste enghel blies mitter bazunen, ende ic hoerde een stemme van den vier hoeken des gulden altaers, datter voer den oghen Godes is, segghende den sesten enghel die die bazune hadde: Ontbint die vier enghelen die in Eufrate, der groter riviren, ghebonden sijn. Ende die vier enghelen sijn ontbonden, die bereet waren onder der uren ende dach ende maende ende jare, op dat si verslaen solden dat derdendeel der menschen. Ende tghetal des hers, dat te peerde reet, was twintichwerve dusentichwerve x dusent, ende ic hoer\de
Auteursrechtelijk beschermd