Nieuwe testament (Noordnederlandse vertaling)

XIII

Ende ic sach uytter zee een beeste op risen ende hadde zeven hoefde ende tien hoernen, ende op haer hoerne had sie tien cronen ende op haer hovede die namen der blasphemien. Ende die beeste die ic sach, was ghelijc enen bonten diere ende sijn voete als eens beren voete ende sinen mont als eens lewen mont. Ende die drake gaf dier beeste sijn macht ende grote moghentheyt. Ende ic sach een van sinen hoefden recht als die verslaghen is in der doet, ende die wonde sijnre doet is gheganset, ende alle die eerde verwonderde ende ghinc na der beeste ende aenbede den drake. Ende want hi der beeste die moghentheyt gegeven hadde, soe aenbeden si oec de beeste ende seyden: Wie is ghelijc der beesten? ende: Wie mach mit haer vechten? Ende haer is gegheven die mont, grote dinghe ende blasphemie te spreken, ende hem is ghegeven mogentheyt twe ende viertich maende toe werken. Ende hi loec sinen mont op in blasphemien jeghens Gode te blasphemiren sinen name ende sinen tabernakel ende die ghene de in den hemel wonen. Ende het is hem verleent strijt te maken mitten heylghen ende die te verwinnen, ende hem is ghegheven moghentheyt in elken gheslachte ende volke ende tonghe ende heydene. Ende si aenbeden alle, die in der eerden woenden, welker name in den boke des levens des lams, dat van beginne der werlt verslaghen is, niet ghescreven en sijn.

Soe wie oren heeft te horen, die hore. Die die vancnisse heen gheleydet hevet, die sal in der vanghenisse ghaen ende die in den sweerde verslaghen heeft, die moet mitten zweerde verslaghen waerden. Hijr is die lijdsamheyt ende tghelove der hilghen.

Ende ic sach een ander beeste opclimmen vander eerden ende hadde twe hoerne ghelijc den lamme, ende sprac als die drake, ende dede alle die macht der ijrster beesten in sijnre theghenwordicheyt, ende dede die eerde ende die daer in wonen aenbeden die ijrste beeste, wies wonde der doet ghesont ghemaket is, ende dede grote teykene, alsoe dat hi oec vuer van den hemel dede neder dalen in der eerde in die theghenwordicheyt der menschen, ende bedrieghet die woenaers in der eerden om die teyken die hem ghegeven sijn te doen in der beesten aensichte, ghebiedende den woeners in der eerden, dat si dat belde der beesten maken, die de wonde des zweerts hevet ende te live gheworden is.

[fol. 171r]

Ende het is hem ghegeven, dat hi gave enen gheest den beelde der beesten, ende dat beelde der beesten selve spreke, ende hi sal doen, dat si verslaghen sullen waerden, soe wie dat beelde der beesten niet an en bedet. Ende hi sal al den groten ende den cleynen ende den riken ende den armen ende den vrien ende den knechten enen carachter doen hebben in die rechter hant of in haren aensichten, ende dat nieman en sal moghen copen of vercopen dan die dat teyken der namen der beesten heeft of tghetal sijnre namen.

Hijr is die wijsheyt: die verstant hevet, die telle tghetal der beesten, want tghetal des menschen ende sijn ghetal is ses hondert ende ses ende tsestich.