Nieuwe testament (Noordnederlandse vertaling)

XIIII

Ende ic sach ende sich, een lam stont opten berch van Sion ende mit hem hondert ende vier ende viertich dusent, hebbende sinen name ende sijns vaders name in haren voerhoefde ghescreven. Ende ic hoerde een stemme van den hemel recht als een stemme van veel wateren ende als een stemme des groten donreslaghes. Ende die stemme die ic hoerde, was als een stemme des herpers, herpende in haren herpen, ende si songhen recht als enen nyen sanc voer den stoel ende voer die vier diere ende voer die oelders, ende nieman en mochte dien sanc segghen dan die hondert vier ende viertich dusent die ghecocht sijn van der eerden. Dit sin se, die mitten wiven niet bevlect en sin, want si sin magheden. Deze volgheden den lamme nae, soe waer dattet hene gaet. Deze sijn uytten menschen van der eerden ghecocht ende sijn Gode ende den lamme die ijrste vruchten, ende in haren monde en is gheen loghen ghevonden; sie sijn sonder vlecke voer den throen Godes.

Ende ic sach den anderen enghel mids doer den hemel vlieghen ende hadde dat ewighe ewangelium, op dat hi prediken solde den ghenen die op die eerde sitten ende op al dat volc ende tgheslachte ende tonghe ende lude, ende seyde mit groter stemmen: Ontsiet den Here ende ghevet hem ere, want die ure sijns ordels coemt, ende aenbedet den ghenen die hemel ende eerde, dat meer ende alle dinghe die daer in sijn, ende die riviren der wateren ghemaect heeft.

Ende een ander enghel volghede ende seyde: Si is ghevallen, si is ghevallen, die grote Babilon, die van den wine sijnre oncuysheyt alden volke toe drincken hevet ghegeven.

Ende die derde enghel volghede hem nae ende sprac mit luder stemme: soe wie die beeste ende haer beelde aenghebedet heeft ende dat ingheprinte teyken in sijn voerhoeft of in sijn hant ontfanghen hevet, deze sal oec drinken van den wine der gramscap Gods, die ghemenghet is mitten heffighen wine in den keelke sijns toerns, ende hi sal ghecruyst waerden in den vuere ende in den sulpher in die the\ghenwordicheyt

[fol. 171v]

der hilgher enghelen ende voer dat aensicht des lams. Ende die roec haere tormenten sal op climmen in ewen tewen, ende si en hebben dach noch nacht ruste, die de beeste ende haer beelde aenghebedet hebben, ende soe wie dat ingheprinte teyken sijns names ontfanghen heeft. Hijr is die ghedoechsamheyt der hilghen ende die de ghebode Gods ende tghelove ons Heren Ihesu Cristi behoeden.

Ende ic hoerde een stemme van den hemel my toe sprekende: Scrijf dattet salighe doden sijn, die in den Here sterven. Want nu voertmeer hiet hi se gheeste, op dat si van haren arbeyde moghen rusten, want haer werke volghen hem nae.

Ende ic sach ende sich, een blenkende wolken ende opten wolken enen sitter ghelijc den zoen des menschen ende hadde op sijn hoeft ene guldene crone ende een scarpe sekele in sijn hant. Ende een ander enghel ghinc uten tempel ende riep mit groter stemmen totten ghenen die opt wolken zat: Set dijn zekele te werke ende maye, want die ure is ghecomen, dat men mayen sal, want die bou der eerden is verdorret. Ende die opten wolken zat, sendede sijn zekel ende mayede die eerde.

Ende een ander enghel ghinc uyt den tempel die in den hemel is, ende hadde oec selve een scarpe zekele. Ende een ander enghel ghinc uyt van den altaer, die moghentheyt hadde over dat vuer ende over twater ende riep mit groter stemmen tot den ghenen die de scarpe zekel hadde, ende seyde: Sent dine scarpe zekel in die bouwe ende snijt of die druven [des wijngaerts der eerden, want sijn druven] die sijn rijp. Ende die enghel sende sijn zekele in der eerden ende sneet den wijngaert der eerden ende warpet in den groten poel der gramscappen Godes. Ende die poel is ghetreden buten der stat ende uytten poel ghinc bloet al totter peerden breydel toe, duzent ende zes hondert stadien verre.