Nieuwe testament (Noordnederlandse vertaling)

XV

Ende ic sach een ander teyken in den hemel, groet ende wonderlic: zeven enghelen hadden die zeven leste plaghen, want daer in is die gramscap Godes vol eyndet.

Ende ic sach recht als een glazene zee, ghemenghet mit vuere, ende die ghene die de beeste ende haer beelde ende tghetal haers namen verwonnen hebben, staende op die glazene zee ende hadden Gods harpen, segghende den sanc Moyses, des knechtes Godes, ende den sanc des lammes, ende seyden:

Here almechtich God, dijn werke sijn groet ende wonderlic ende dijn weghe, Here, der hilghen coninc, sijn gherechtich ende warachtich. Here, wie en sal dy niet ontsien ende groet maken dynen name? Wanttu bist alleen goedertiren. Want alle lude sullen comen ende anebeden in dinen aensichte, want dijn ordele sijn gheopenbaert.

Ende na dezen dinghen sach ic ende sich, den tempel des tabernakels des ghetughe is op ghegaen in den hemel, ende zeven enghelen ghingher uyt, die de zeven plaghen hadden van den tempel, ghecleet mit enen reynen blenkenden steen

[fol. 172r]

ende omtrent die borsten ghegort mit guldenen riemen. Ende een van den vier dieren gaf den zeven enghelen seven guldenen fyolen, vol der gramscap Godes, die in ewen toe ewen levende is. Ende die tempel is vervollet mit roke van der groetheyt Gods ende van sijnre moghentheyt, ende nieman en mochte in den tempel ghaen thent die zeven plaghen der zeven enghele vervullet worden.