Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Waer bi die goede liede nu gheen miraclen en doen also si wilen daden. C. VII.

 
NU berecht mi / lieve Ian /
575
Hoe so maeght comen dan /
 
Na dien dat tfolc es so goet/
 
Dat en ghene miraclen en doet
 
Gelijc de Santen wilen daden?
 
Wouter / al sonder beraden
580
Segghic u met waerheden
 
Dat noyt Sant mirakel en dede /
 
En̄ dat gheen Sant horen en can
 
Watmen hem bidt of roept an /
 
Maer het hoert al onse Here
585
Die doer sire Santen ere
 
Die bede doet willechlike
 
Op dat die bede es salechlike /
 
En̄ die bidt dat hi tien stonden
 
Es buten hoeft sonden.
590
Oec willic u dit segghen bloet /
 
Der mirakelen was noet
 
Int beghin van kerstenhede /
 
Want heydene en̄ ioden mede
 
Waren also vaste gheset
595
In haer ghelove en̄ in hare wet
 
Dat si niet en wouden bekeren
 
Om der goeder liede leren /
 
So dat God wilde toghen
 
Mirakelen voer haren oghen;
600
Want si meer den mensche trecken
 
Ten ghelove en̄ verwecken
 
Dan predicatie ofte woert
 
Ofte yet datmen segghen hoert;
 
Want daer met toende hi openbaer
605
Dat hi ghewarech God waer /
 
Daer si hem om pinen lieten /
 
In minnen sonder verdrieten /
 
En̄ dat si dan om dat
 
Souden gheloven te bat:
610
Dits de redene en dbedieden
 
Dat mirakelen ghescieden.
 
Wouter / voer waer segghic u
 
Dat onder dat volc nu
 
Meer heyligher liede sijn / te waren /
615
Dant hier voermals ye ghewaren /
 
Ia die also heylich sijn
 
Als Sinter Claes of Sinte Augustijn /
 
Of Sinte Aechte of Sinte Gheetruyt /
 
Al en eest niet over luyt
620
Den volcke noch openbare.
 
Wouter / ic segghe u ware /
 
Gheloves mi of ghi wilt /
 
Maer nijt heeft so dicken scilt
 
Dat mene niet en can doerhouwen /
625
Dat machmen aen den meneghen scouwen.

Vorige Volgende