Kleyn liedtboecxken

[p. 3]

Voor-reden.

ALsoo ick hoore ende verstae beminde jeucht, dat vast hier ende daer, verscheyden ghesanghen, Nieuwe Iaren, ende Bruylofts-Liedekens ghesonghen worden, waer van die sommighe weynich stichtinghe mede brenghen, jae darmen somtijdts oock nauwelijck weet (nae het ghemeene spreeck-woort) oft visch, of vleesch is; andere loopen strecken in, die de jeucht meer tot vlee-

[p. 4]

schelijcke, als tot gheestelijcke saken schijnen te verwecken:

Daerom so heb ick selfs mijn eygen sinnen, daertoe ghedwonghen ende gheleyt, teghen mijn ghenegenheyt ende gemoet aen (dat met andere wercken besich was, ende oock veel meer tot treuren als tot singhen, (om die schade Sions ende andere swarichheden) gheneghen is) om die jeucht metter haest twintich ofte dartich Nieuwe Iaers ende Bruylofts Liedekens te ontwerpen, die op malcander sluyten ofte achter malcander wel voeghen, tot leeringhe ende vermakinghe van de jonckheyt, om haer yets afteleyden van onstichtelijcker, ofte weynich stichtende sangen, waer toe ick oock verscheyden vooysen, diese veel ghewoon sijn te singhen ghebruycke, op dat mijn werck te meer vrucht soude moghen schaffen, welcke boecxken ick eyghent-

[p. 5]

lijck die jonckheydt deser Stede toeeyghene, beneffens andere sanghers ende sangerssen.

Doch ick en soeck u.l. hier mede niet af te trecken van de oude ghewoonlijcke lieden, ende andere geest-rijcke sanghen, die ick geern wil wijcken ende die ick u voor mijn onvolmaeckte ghedichten aen recommandeere, maer het sal my ghenoech sijn, dat ick u slechts van soodanighe ghedichten (al sijnse na de konst cloeckelijck gestelt) wat mochte aftrecken, die weynich stichtinghe gheeft en leven in hebben, ende waer in het caf onder het coorn, oock eensdeels mochte ghemenght zijn.

Daer beneven deel ick u.l. oock mede verscheyden van mijn andere voorgaende Sanghen, Psalmen, Lof-sangen Gebeed-ende Claegh-Liedekens, om van een yder na die gheleghentheyt des tijdts ghebruyckt te worden, tot

[p. 6]

Godes prijs, tot stichtinghe des naestens, ende tot beteringhe, troost ende vermakinghe sijns selfs, etc. Laetet alles ordentlijck met aendacht, sonder lichtveerdicheyt gheschieden, waer toe die Heere u sijn ghenade wil verlenen, Amen. Vyt Hoorn Anno 1633.

Nae beter.

Pieter Iansz. Twisck.