Historie van Malegijs

Hoe dat Malegijs thuys quam, ende hoe hi beclaechde Oriandens doot die van drucke sterf, als si hoorde seggen dat Rootsefluer ghewonnen was.

MAlegijs als hi [te] sint Iacobs hadde geweest so quam hi na huys ende Oriande, ende zijn knape die van Rootsefluer quam bracht die tidinghe dat die stadt ghewonnen was daer Oriande alsulken druc in maecte dat si te Lyons sterf van drucke daerse Malegijs eerlic dede begraven ende reysde van daer met druck na Eggermont want hem te Lyons geseyt was dat zijn vader, zijn oom, ende Gautier van Lyons verslagen waren ende hoe coninck Karel ende dye heren daer af haer wrake gedaen hadden ende hi reysde met sinen knape tot dat hi quam voor Eggermont. Doen Aymijn hem vernam so is hi hem te gemoet gecomen vriendelic willecom hetende: ende hi vraechde na Oriande zijn moye. Doen seide Malegijs. Lieve neve si is gestorven, God wil der sielen geleiden, mer hoe ist hier gestelt. Aymijn seide. U vader is hier verslagen ende u oom ende Gautier van Lyons mer daer is wraken genoech af gedaen. Doen Malegijs dit hoorde so seide hi. Hoort Aymijn neve na dat aldus ghestelt is so wil ic gaen sitten weder in mijn cluyse ter tijt toe dat betert. En ghi mijn getrouwe knape ic wil dat ghi hier in Eggermont ruwaerder sijt, ende voor den ghetrouwen dienst die ghi my ghedaen hebt soo sal ick u ridder slaen ende die heren gingen eten ende drincken ende doen ginc een iegelic te rusten. Des anderen dages so stont Malegijs op ende gaf Galier die knape den last vander stadt ende Aymijn reysde

[p. 346]

na Dordoene. Ende Malegijs nam oorlof aen die ghemeente ende aen Aymijn sinen neve, ende hi reysde weder int bosch van Lyons daer hi sadt heremijt ter tijt toe dat Aymijn vrou Aye getrout had daer hi vier kinderen bi hadde, als Ridtsaert, Wridtsaert, Adelaert ende Reynout. Van welck een schoon ende ghenoechlijcke historie gheprint is dye gheheeten is Van die vier Aymijns kinderen. In welck men veel wonderlijcke dinghen van hem leest. Ende ten lesten quam hi noch tot een salich eynde. Twelck ons gonne die vader die sone ende die heylighe gheest. Amen.

Hier eyndet die historie van Malegijs.

DIt boeck geheeten de Historie van Malegijs, is ghevisiteert by eenen gheleerden Corector vander K.M. daer toe gecommitteert. Ende byder Keyserlijcker Maiesteyt toegelaten ende geconsenteert Ian van Ghelen, dat hy duerende den tijt van drye Iaren tvoorscreven boeck geheeten de Historie van Malegijs alleen sal mogen printen oft doen printen oft vercoopen, So wort byder voorschreven K.M. verboden alle ander boeckprinters ende boeckvercoopers, dit selve boeck niet na te drucken ende conterfeyten binnen onsen voorseyden lande voor den tijt van drye Iaren gepasseert is, op de pene ende confiscatie vanden selven boecken, Ende daer boven te incureren tot behoef vander voorseyder Supliant de emende van .xx. Carolus guldens by elcken vanden ghenen die de contrarie daer af doen sal.

Ghedaen inde Stadt van Bruesselle den lesten februarij. Anno .xvc. ende .liiij. stilo brabantie.

Onderteekent. P. de Lens.

Gheprint Thantwerpen. Anno .xvc. lvi.