De Arabische Alkoran

Van Aomar die Eubokaras Successeur ofte naekomer gheweest is. VII. Capittel.

NA de doodt van Eubokara, so nam hem Aomar de wet ende regeeringhe aen, ende was seer neerstich inde bedieninghe desselven. Sijn Vader hiet Alhata de Sone Alfayl, die wan Abbalor, ende Abbalor was een Sone Reya, ende Reya was een Sone Ady, die wan Kaab, ende sijn Moeder hiet Kalkumia een Dochter Obscib, die wan Almugira, de Sone Abballa, die wan Aomar, de Sone Machtum.

Dese Aomar wert na de voorsegginghe des Propheten tot de regieringe gelijck Eubokara verkoren, hy hielt hem vast aende wet, ende regeerde het volck met een groote wijsheydt ende verstant, hy hadde een aensienlick Krijghs-volck ende bracht veel vremde natien onder zijn gewelt: ende na sijn bevel so werden alle boecken ende schriften der wet te samen in een boeck gedragen, ende de Schribenten die dit deden, zijn daerom van hem seer statelick vereert ende begaeft gheworden. Hij was de eerste die ordineerde, datmen inde Maent Rama dan in alle Moscheen of Kercken het gebedt soude doen. Hy heeft oock verordent dat op het laetste van deser maent den gantschen Alkoran soude deurlesen werden. Hy droech aen sijn vinger den rinck die eerstelick Mahometh ende daer nae Eubokara gehadt hadde.

Sijn Scribenten waren: Abdalla ende Zayd een Sone Thebid. Hy was lanck van persoone, bruynlichtich in ’t gesichte ende hadde een kale kop, ende een dunnen wit lichten baert: ende hoewel hy een dapper ende oversaegt persoon was,

[fol. 26]

soo is hy nochtans van Almugira sijn lijf eygen omgebracht gheworden. Hy heeft 62 Iaer geleeft, ende sijn begraeffenisse is neffens des Propheten ende Eubocara ghemaeckt gheworden. Hy heeft alle Iaren een Bevaert na Mecha gedaen: Maer als hy seer swack wert, ende de kranckheyt hoe langs hoe meer toenam, ende dat hy oock bemerckte sijns levens eynde, soo heeft hy bevolen datter seven van haer voor hem verschijnen souden, namelick Odmen, Alij, Thalba, Azura, Wayr, Kaad ende Abdarachem, ende dat sy souden beraetslaghen wie na sijn doodt inde regeeringhe komen soude. Ten laetsten seyde hy: ic trede nu af van mijn regeeringe, so is daerom seer hooch van noode, dat ghy met vlijt raetslaeght om een ander deughtsaem Regent in mijn plaetse te verkiesen. Doen wert daer met eendrachtiger stemme verkoren: Odmen, die verkreeg een matelicke somme ghelt van Auff, de Sone Abdarachem, maer dat gelt was van sijn Voorouders, doch soo schanck ende deelde hy dat gelt uyt, soo wel deses als ander gelt, dat hy van sijnen Vader hadde, alles met malkander.

Dese Aomar heeft thien Iaer gheregeert, ende eenen dach minder als ses maenden, ende hy is tot dese digniteyt verheven geworden in ’t derthiende Iaer na dat Mecha van Mahometh ghewonnen wert. De Prophete Mahometh heeft noch by sijns levens tijde bevolen datmen desen Aomar neffens hem begraven soude, hy storve waer hy wilde, ’t welck oock geschiet is.

Mahometh plagh te seggen, dat de gene die sonder sijn gegeven ordinantien, ende sonder bywesen vander selver Adherenten storve, die vaert daer henen als de beesten, daerom sal oock een sulcke sonder eenige pomperye ende graviteyt begraven werden.