Nieuwe Testament (Zuidnederlandse vertaling)

Hier beghint Judas epistole

Judas, knecht Ihesu Christi ende Jacobs brueder, den geminden, die in Gode den vader sijn ende die van Ihesu Christo onthouden sijn ende geroepen, ende seeget: Ontfermhertecheit ende vrede ende caritate moet met u vervult werden.

Alderliefste [Karissimi, omnem sollicitudinem faciens scribendi uobis de communi uestra salute, necesse habui scribere uobis deprecans supercertari semel tradite sanctis fidei - Alre liefste, alle sorffachtecheit doende u te scrivenne van der ghemeenre salecheit, so haddic noot u te scrivenne biddende dat ghi strijdt metten gheloeve, dat eenwerf den heileghen ghegheven es (corr.)], ic hebbe alle sorfhertecheit u te scrivene, maer ic hadde u noot te scrivene van uwer gemeinder salecheit, biddende den heilegen, die eenwerf gegeven sijn den geloeve, datse sege vechten. Want selke ongenedege menscen sijn van onder in ghegaen, die hier voer maels voer screven sijn, ende sijn ongenedech in desen ordeele, want si sijn overdragende de gracie Gods in luxurien ende sijn loechgenende onsen Here Ihesum Christum, die allene es een heerscapere.

Maer [Commonere autem uos uolo, scientes semel omnia, quoniam Ihesus populum de terra Egypti saluans] sijt wetende

[fol. 170r]

: ic wille u te male alle dinc leeren [vermanen die eenwerf alle dinc weet (vervanging corr.)], want Ihesus Christus was behoudende sijn volc vanden lande van Egypten, ten anderen male verloes hi de gene, die niet en geloefden, ende de ingele, die niet en hielden hare heerscap, maer lieten hare woeningen, die hielt hi inden oerdeele des groets Gods in ewegen banden onder de donkerheit, geliker wijs dat Sodoma ende Gomorra ende de stede, die daer omtrent waren, hebben overspel gedaen ende sijn achterwert gegaen na den vleessce, ende sijn worden een exempel, gedoegende de pine. Maer seker degene die tvleesch bevlecken, die versmaden theerscap gelijc den anderen, ende si blasphemeren de majesteit. Doe Mychiel die erdsche ingel disputerende was ende sprekende metten duvel, doe en dorste hi niet in bringen ordeel der blasphemen van Moyses lichame, maer hi sprac: De Here moet di gebieden. Maer seker dese blasphemeren so wat dinge si niet en bekinnen, ende si werden gecorrumpeert of bevlect in dien, diese natuerlec bekinnen alse stomme beesten. Wee den genen, die af gegaen hebben in Cayms wech

[fol. 170v]

ende die geconfuust [uutgestort] sijn in Balaams doelnessen overmids loen of huere ende die vervaren sijn in der contradixien ocht wedersegginge Chore. Dese sijn onreinlec werscapende in haren spisen ende sijn hen selven voedende sonder vrese, ende si sijn wolken sonder water, die ommegedragen werden vanden winden, ende si sijn onvrochtbare heerftboome, die tweewerf doot sijn, die geplant sijn bider vloet der wreeder see, ende si sijn disputerende vanden sterren die al omme loepen te harre confusen, den welken de vreese of anxt der donkernessen gehouden es in der eewecheit. Enoch, de sevende na Adame, propheteerde van desen ende seide: Siet, de Here sal comen in sinen M heilegen, vonnesse te doene jegen alle menscen ende te berespene alle de ongenedege van al haren werken der ongenedecheit, in den welken si ongenedechlec gewracht hebben, ende van allen den wreeden dingen, die si gesproken hebben jegen hem. Dit sijn de ongenedege sunderen ende dit sijn murmureerres ende beclagers, ende sijn wandelende na hare begerte, ende hare mont sprect hoeverdecheit, ende si sijn prisende die persone om gewin

[fol. 171r]

ocht omme neeringe.

Maer gi, alderliefste, gi selt gedachtech sijn der woerde die gepredect sijn vanden apostelen ons Heren Ihesu Christi, die u seiden, dat in den lesten tiden selen comen bespotteren, die wandelen selen in ongenedecheiden na haren begerten. Dese sijn, die hen selven sceeden ende sijn beesteleke, niet hebbende den geest. Maer gi, alderliefste, sijt u selven stichtende tuwen alderheilechsten geloeve ende sijt biddende in den heilegen geest. Behoudt u selven inder liefden Gods ende sijt verbeidende de ontfermhertecheit ons Heren Ihesu Christi in dat eewege leven, ende ordeelende berespt dese, maer gripende of nemende behoudt dese vanden viere, maer ontfaermt der andere in vreesen, ende sijt hatende den bevlecten roc die vleesscelec es.

Heme allene, Gode onsen behoudere bi onsen Here Ihesum Christum, dien si glorie ende groetheit ende mogentheit vore alle die werelt, ende nu ende in alle de werelt der werelde. Amen. De welke die mechtech es u te behuedene sonder sunde ende u te settene onbevlect vore de anscouwinge sijnre glorien in vrouden, in der toecomst ons Heren Ihesu Christi.

Hier es ute Sente Judas epistele.

[fol. 172r]