Historie van Reynaert die vos

[Cap. VI.] Hoe die coninc spreect op die claghe

DOe sprac die coninc Heer dass hoerdi dit wel van desen clusenaer uwen oem. hij heuet soe gheuast ende ghebedet. leue ic een iaer hij salt becopen Nv hoert cantecleer der clagen is ghenoech Uwe dochter die hier doot leyt willen wy des doden recht doen. wi en mogense niet wel langher houden wy willense gode beuelen wy willen vygilie singhen ende brenghense met groter eeren ter aerden Ende dan willen wy ons met dese heren bespreken ende raet nemen hoe dat wy desen groten moert ende desen onghenadighen reynaer te rechtighen moeghen brenghen Ter stont gheboot dye coninc ionghen ende ouden. dat si vigilie singhen souden Daer begontmen aen te slaen Placebo domino in re. mitten veersen daertoe dienende daer ic v meer of segghen soude Mer dat vertrecken waer my te lanck Doe dese vygilie wt was ende die commendacie soe

[fol. 7r]

wort si int graf gheleit Ende daer wort een pollijst mermorsteen op dat graf gheleit die also claer was als een glas ende daer wert op gehouwen met groten letteren aldus: die goede Coppe Cantekleers dochter. die reynaer die vos mit valscher lagen verbeten heeft die leyt hier onder begrauen. beclaget hoer. want si scamelic in horen doot gecomen is: /496-543/ die coninc ontboet alle die vorsten ende wysen vanden rade om hem te bespreken hoe hy desen groten moert ende ondaet an reynaer die vos rechten mochte: doe ouerdroegen die wise ende rieden den coninck voert beste dat hi reynaert ontbieden soude dat hi des niet en liet om gheenre saken wille. hi en quame tot des coninghen houe te ghedinge Ende datmen bruun die bootscap doen soude laten Den coninc docht dattet alsoe goet waer Ende seide tot bruyne den beer Heer bruyne dese boetscappe wil ic dat ghy doet Mer ymmer siet wel toe voer v Want reynaert is quaet ende fel ende hi weet alsoe menich verraet hi sal leggen ende smeken. nochtans sal hi hem bedencken om v te bedriegen te bespotten of te schymp te brenghen Wat lieue here laet dit goet wesen Hoent mi reynaert soe hebbe ic mine casus qualiken gheleert Ic en salten soe verghelden dat hij wel tcortste

[fol. 7v]

eynde trecken sal Aldus so schiet bruijn blijde van daen Mer tis te duchten dat hi soe blide niet weder om en quam