Historie van Reynaert die vos

[Cap. XXXIX.] Hoe reynert ten cride quam. ende hoe si ghinghen vechten

ENde als die coninc vernam dat hi aldus gheschoren ende besmeert quam sprack hi Ey heer vos hoe wel condi tot v seluen sien dat verwonderde hem also sere. spottelick was hi aen te sien. hi neech den coninc ende der coninghinnen mitten hoefde sonder spreken en hi streec slechtes in dat crijt Die wolf die was daer oec mitten sinen in. ende si spraken menich moedich woert Die crijtwaer\ders /6914-6962/ waren die lupert ende die los die brochten daer die heylighen voert dat die vos een moerdenaer ende een valsch verrader waer Ende dat hi argher noch quader niet wesen en mocht dat woude hi op sijn lijf waer maken Reynert die vos swoer dat hi loech als een valsch boef ende een vermaledijt scalck Ende dat soude hi op sijn lijf waer maken Doe si aldus ghesworen hadden doe spraken die crijtwaerders. doet nv dat ghi sculdich sijt te doen Doe ruymden si alle gader dat crijt sonder vrouwe rukenauwe. die bleef staen\de

[fol. 97r]

bi reynert ende vermaende hem dat hi dochte op die woerden die si hem gheseit hadde des morghens voerden daghe Neue sprack si. siet selue toe dat ghelt v meest ghi conde selue wel gaen ende spreken doe ghi seuen iaer out waert Oec soe meende ic dat ghi noch wel bi nachte sout duusterlinghe gaen sonder dwalen sonder lanteern of sonder maneschijn daer ghi wat goets wist te halen Ghi hiet oec onder die luden die ghene die v kennen alle weghe wijs te wesen Pijnt v vlitelick een stout heelt te wesen dat is tijt siet dat ghi uwen viant verwinnet. so moechdi hebben ewelicken prijs Liefste moeye ick ben des wel wijs dat ghi mijn best gheerne saghet Ic sal daer gheerne om dencken Ic hope huden alsulcke eere te beiaghen dat ghi ende alle mine maghen des eere sult hebben Ende mijn vianden toern scade ende scande Si sprack god ghunt v