|
| |
Van den Langhen Waghen, ende van zijn licht-gheladen Vracht, van
alderhande volcxken. Seer ghenoeghlijck om te lesen.
Groote nieuwe maren heb ick vernomen
Dies moghen wy ons allen wel verblijden
Hier is een langhe Waghen ghecomen,
Wy sullen nu allen goet coop rijden
Daer en derf nu niemant meer gaen besijden
Elck mach nu vry zijn schoenen spaeren
Laet sorghen varen, laet treuren lijden,
Wilt vromelijck op de waghen schrijden,
Den Langhen Waghen sal gaen varen.
| |
| |
Maechdekens daer sloot in is ghevallen
Van meer dan haerder drie oft viere
Die sullen voor sitten met haer allen,
Alleen om hare ontfermhertighe maniere
Coppelersse die kloeck zijn van bestiere,
By de welcke alle vrou Venus kinderen vergaren
Alle Vroukens die eerbaer zijn perderiere
Zit op de Waghen maeckt goet chiere,
Den langhen Waghen sal ghaen varen.
Nopperse die geerne int ravot, zijn,
Verleserssen die geerne speelen en koken
Ende alle die met vrou
Venus besnot, zijn,
Zit op, v is een stede besproken,
Jonckvrouwen die noode haer doexkens kroken
Gaep teylen, Laudaten, en suicke blaren
Alle die Maerten de vuyl pottagie koken,
Schickt v by een, sit sonder stoken,
Den langhen Waghen sal ghaen varen.
Alle die Coppelen cunnen drayen
Ofte die Faelgien cunnen vouwen
Ende alle die sonder keersen wel naeyen,
Sullen oock op de Waghen sitten in trouwen,
Biddelersen, Comeren, ende Vroe-vrouwen,
Klappeyen, Toveressen, ende Maren
Ende alle die geerne leertouwen,
| |
| |
Moghen al te samen wel achter aen houwen,
Den Langhen Waghen sal ghaen varen.
Schoone vrouwen die in t'stouen gaen varen
Ende anderen oock die Huys-musschen schieten
Weerdinnen die haer ghasten gherief doen
Ende met sint Joris Vissop gieten,
Ghenen arbeyt en laeten sy hun verdrieten,
Want sy heur dickwils soo minnelijck paren,
Sy sullen daer voor haer deught ghenieten,
Het waer quaet dat wijse achter lieten,
Den Langhen Waghen sal gaen varen.
Papen met de costers, de een met de anderen
Bagijnen, ende Susters maeckt v bereedt
Ghy Gheestelijcken schickt v by malkanderen,
Ghy weet wel waer v plaetsken steet,
Man oft Wijf die achter wt sleet,
Pijpers, en Bommers, en die speelen op snaren
Ten is gheen noot dat yemant geet,
Zit op, al waert den Voerman leet,
Den Langhen Waghen sal ghaen varen.
Haest v allen die mede sullen rijden
Ghy roeckeloose vander Milaer banck
Voert v kleederen in lombaerdijen,
Want Hasaert verlost v van 't gheklanck,
Nauwelijcx en suidy smorgens houden een blanck,
| |
| |
Zit alle op met groote scharen
Scheue, Scheluwe stom, ende manck:
Kreupele, Kromme, schorfde, ende cranck,
Den Langhen Waghen sal gaen varen.
Alle die geerne haer keelken netten
Groote stercke dronckaerts waren quaet vergheten
Men salse mede op de waghen setten,
d'Een dronckaert laet het den anderen weten
Jae al die goet geweest hebben al zijnse versleten,
Achter lam, ende oudt van Jaeren,
Zy waren ghoet mede op gheseten,
Comt alle men sal v voeten meten,
Den Langhen Waghen sal gaen varen.
Tant-treckers, ende Driakel-coopers
Makelaers ende Rosch-tuysschers, zit achter int beste
Truwanten, Rabauwen, ende Landt-loopers,
t'Vergaert hier al wt oosten, ende westen,
Al vonde ick uwer hondert nesten,
Ick en souder niet eenen openbaren
Quisteerders elck met zijnder questen,
Schickt v by een, Godt kent de besten,
Den Langhen Waghen sal gaen varen.
Oock die hem voor dieuen kan wachten
Ende zijn kleederen hoedt voor de Motten
Ende tgelt te vooren neemt van drie pachten,
Sorght niet dat sulck volck geldt sal potten,
| |
| |
De ghesellen souden met hen spotten,
t'Geldt soude hen te seer beswaren
Oft t'mochte hen in haer borsen rotten,
Zit op den Waghen ghy jonghe sotten,
Den Langhen Waghen sal ghaen varen.
Isser yemant achter van dien van doene
Niemant en schame hem, comt sonder prijcken
Al en waert niemant dan den blinden coene,
Hy mach wel op den wagen gaen strijcken,
Een schoon herte soude hem wel ghelijcken,
Maes Bacx wijf spint soo goeden garen
Sotten ende Sottinnen wt allen wijcken
Haest v loopt sonder omme kijcken,
Den Langhen Waghen sal gaen varen.
Wagheman kijckt eens om besiet v Vracht
Wat lichter stoffe hebdy ghelayen
Wie hadde hem voor sulcken volck ghewacht,
Het soude wel met den winde wech wayen,
God heeft den Wagheman Vracht berayen,
Vaert, wegh, God wil v wel bewaren,
Ten langhen-waghenwaert gaen wy drayen,
Die 't niet en cost, wat mach 't hem schayen,
Den Langhen Waghen wil gaen varen.
|
|
Auteursrechtelijk beschermd