|
| |
[Van t'arme Bier, dat kranc, ende watersuchtig is.]
Een beklaeghelijck Refereyn, Van dat arme Bier, hoe dattet seer
kranck, ende Watersuchtigh is. Seer ghenoeghlijc om te lesen.
Ghy lieue Drincke broeders bidt voor dit bier,
Want den adem wil uyte, t'is seer kranc hier,
t'En wasser noyt soo qualijcken ane
Wy moeten al blijuen op de bane,
Alle die daer geerne pleghen mede om te gane,
| |
| |
Het wort seer beklaecht van menighen Kuythane,
Om dattet in alsulcken quale is ghesleghen,
Van een iammerlijc gebrec, my deert dat ickt vermane
Want het heeft een groote Water-ziecte ghekreghen,
Ghy die daer raet of remedie weet teghen
Comt, ende helpet doch wt rechter ghenaden
Het heeft langhe tijt dus plat gheleghen,
Want dit arme Bier heeft het water gheladen.
Het heeft langhe ghesien seer bleeck, ende blaeu
Maer nu ist t'eenemael flaeuwer dan flaeu,
Het en heeft niet een haerken op zijnen kam,
Ten heeft reuck noch smaeck, ten stont noyt so nauwe,
En bysonder sint dat Maria van rossum quam,
Zy dede dat men't eenemael zijn cracht benam,
Al lagh het te vooren ghenoegh in qualen,
Och, ick worde daerom so bloedelijcke gram
Datmen de schade op t'arme Bier wil verhalen,
En op mijn Heer van Halewijn, dat zy moeten betalen
Die soo menighen ghoeden ghilde kunnen versaden,
Jae ick vreese dat ons t'Bier op t'leste sal falen,
Want het arme Bier heeft het water gheladen.
Mijn Heere de Kan sit soo deerlijck int ghetreure,
Om dat dit arme Bier als een magher leure,
| |
| |
Kranck is hy en weet ter werelt geen lieuer vriendinne
Men schooter wel een bout van seuen ellen deure,
Het leyt en zwalpt, ten heeft niet dan t'water inne,
Och, sterft het Bier, ick verliese mijn sinne,
Ick sorghe jae, nae dat de sieckten uytwijsen,
Want waer ick my keere of waer ick my winne,
Ick en hoore niemant het onnosele Bier meer prijsen
Och condemen noch vinden eenighe provisen,
Die dit arme Bier een weynich mochte comen in staden
Comt thoont v hulpe alle lieve Accijsen,
Want het arme Bier heeft het water gheladen.
Het maeckt nu de broeders alle confuys
Om dat men t'arme Bier doet sulcken kruys,
t'welck in seuen jaeren niet al te ghesont en was
Och het dede ons soo hertelijck loopen van huys,
Als wij hoorden segghen dattet ghenas,
Maer (eylaes) nu ist teenemael inden plas,
Het swalpt inden buyc, ten can niet verheughen,
En twort alle daghen hoe langher hoe argher gebras
Ten sal haest nau om wat te spoelen deughen,
Niemant en achtet dan onnutte zeughen,
Die daer in plossen als Eenden die baden
| |
| |
Dit is die meeste oorsake datment niet sal meughen,
Want het arme Bier heeft het water gheladen.
Prince wy bidden u ootmoedelijc voor onse Vrouwe
Soect doch remedie in eenighen Wouwe
Op dat dit arme Bier wat verfrayen magh,
De Brouwers gaen soo deerlijck inde rouwe,
Zy klaghen en kermen den gantschen dagh,
Ende alle Drincke-broeders maken sulcken gheklagh
Een steenen hart sout moeten erbarmen,
Om datmen dit Bier noyt naerder en sagh,
Ghy Bier-makers tis in uwer macht wildy beschermen
Verhoort het ghebedt van uwen armen
Ten is anders niet mogelijc dattet mach verfrayen,
Doet het met wat meer Hoppe en Mout verwarmen,
Want het arme Bier heeft het water gheladen,
|
|
Auteursrechtelijk beschermd